ފައިނޭންޝިއަލް ޕެކޭޖު ތަކަކާއެކު ރާއްޖޭގެ ރިސޯޓްތަކަށް ރިނިއުބަލް އެނަޖީ ސޮލިއުޝަން ފޯރުކޮށްދިނުމަށްޓަކައި ސްޓެލްކޯގައި ޒަމާނީ ޝޯރޫމެއް ހުޅުވަމުން މަސައްކަތް ކުރަމުން ދާކަމަށް އެ ކުންފުނިން ބުނެފި އެވެ.

އެމްއެމް ޓީވީގެ "ބޮޑު ޚަބަރު" ޕްރޮގްރާމްގައި ރޭ ވާހަކަ ދައްކަވަމުން ސްޓެލްކޯގެ މެނޭޖިން ޑިރެކްޓަރު ހުސެއިން ފަހުހީ ވިދާޅުވީ އެ ކުންފުނިން އާންމު ވިޔަފާރީގެ ތެރެއަށް ނުވަންނާނެ ކަމަށާއި، ނަމަވެސް ރިސޯޓް މާކެޓަށް ސޯލާ ސޯލިއުޝަން ފޯރުކޮށްދީ އަދި ކަރަންޓް ފޯރުކޮށް ދޭން ބޭނުންވާ ބޮޑެތި ސާމާނު ވިއްކަން ނިންމާފައިވާ ކަމަށެވެ.

ފަހުމީ ވިދާޅުވި ގޮތުގައި ރައީސް މުހައްމަދު މުއިއްޒު ބޭނުންފުޅުވާ ސްޕީޑުގައި އިޔާދަ ކުރަނިވި ހަކަތަ ގާއިމް ކުރުމަށް ޓަކައި ސްޓެލްކޯގެ އިތުރުން އެހެން ފަރާތްތަކުން ވެސް ރިނިއުބަލް އެނަޖީ އަށް ދާންޖެހެ އެވެ.

"އަޅުގަނޑުމެން ޝޯރޫމެއް މި ހުޅުވަނީ. އެތާ ވިއްކަން ގަސްދު މިކުރަނީ ޖަނަރޭޓަރާއި ޓްރާންސްފޯމަރާއި ޕެނަލް ބޯޑައި ކޭބަލާއި އޭގެ އިތުރަށް ރިނިއުބަލް އެނަޖީގެ ޓޯޓަލް ސޮލިއުޝަން. ފައިނޭންސް ޕެކޭޖަކާއި އެއްކޮށް ރިސޯޓުތަކަށް ރިނިއުބަލް އެނަޖީ ތައާރަފުކުރަން އަޅުގަނޑުމެން ބޭނުންވަނީ."

ފަހުމީ ވިދާޅުވީ ރިސޯޓް މާކެޓަށް ޚިދުމަތް ދެވޭނެ ވަރުގެ ފަންނީ ގާބިލު ކަމާއި ތަޖުރިބާ ސްޓެލްކޯގެ މުވައްޒަފުންގެ ކިބާގައި އެބަހުރި ކަމަށެވެ. އޭނާ ވިދާޅުވީ ސްޓެލްކޯ ގޯތި ތެރޭގައި އަމީނީ މަގަށް ވާގޮތަށް މިހާރު ހަދަމުން ގެންދާ 7،500 އަކަފޫޓުގެ ޝޯރޫމަކީ ވަރަށް ރީތި ފުރިހަމަ ތަނަކަށް ވާނެ ކަމަށެވެ. އެތަނުގެ ގިނަ މަސައްކަތްތައް އެ ކުންފުނީގެ މުވައްޒަފުން ކުރާތީ އެތަން ހެދުމުގެ ހަރަދުން ގާތްގަނޑަކަށް 12 ނުވަތަ 15 މިލިއަން ރުފިޔާ ސަލާމަތް ކުރެވުނުކަން އޭނާ ފާހަގަ ކުރެއްވި އެވެ.

"ގާތްގަނޑަކަށް 12 ނުވަތަ 15 ވަރަކަށް މިލިއަން ރުފިޔާގެ ސޭވިން އެއް މުވައްޒަފުންގެ މަސައްކަތުން ގެނެވިފައި އެ ހުރީ. ދިވެހިން ކުރާ މަސައްކަތުގައި އޮއްޓަރެއް ހުންނާނެ. ސްޓެލްކޯ އަކީ ސައްތަ އިން ސައްތަ ދިވެހި މުވައްޒަފުން މަސައްކަތްކުރާ ތަނެއް. އަޅުގަނޑު ވަރަށް ފަހުރުވެރިވާ ކަމެއް އެއީ،" ފަހުމީ ވިދާޅުވި އެވެ.

ސްޓެލްކޯ އިން އިތުރަށް ބުނީ ޒަމާނަށް އަންނަ ބަދަލާއިއެކު، ބެޓެރި ވެހިކަލް ޗާޖު ކުރެވޭނެ މަގުފަހިކޮށްދިނުމަށް ވެސް އެ ކުންފުނިން މަސައްކަތް ކުރަމުން އަންނަ ކަމަށެވެ.