ރާއްޖެއިން ބޭރަށް ދަތުރުކުރާ ޕަސިންޖަރުންގެ އަތުން ނަގާ ޑިޕާޗަރ ޓެކްސް އަދި އެއަރޕޯޓް ޑިވެލޮޕްމަންޓް ފީ (އޭޑީއެފް) ބޮޑުކުރުމަށް ސަރުކާރުން ނިންމާފައިވާ ނިންމުމަށް އަމަލުކުރަން މާދަމާ ފެށޭނެއެވެ.

މި ބަދަލުތައް ތަންފީޒުކުރަން ފަށާނީ 2024 ވަނަ އަހަރުގެ ޑިސެމްބަރ 1 ވަނަ ދުވަހުން ފެށިގެންކަން ސަރުކާރުން ވަނީ މީގެކުރިން ހާމަކުރައްވާފައެވެ.

މި ބަދަލުތަކުގެ ސަބަބުން އެކި ގިންތީގެ ފަސިންޖަރުންނަށް ތަފާތު އަގުތަކެއް ޑިޕާޗަރ ފީގެ ގޮތުގައި ކަނޑައަޅާފައިވެއެވެ.

އެގޮތުން ބިޒްނަސް ކްލާހުގައި ދަތުރުކުރާ ފަސިންޖަރުންގެ ޑިޕާޗަރ ޓެކްސް އަދި އޭޑީއެފް 120 އެމެރިކާ ޑޮލަރަށް ބޮޑުކުރެވޭނެއެވެ. ފަސްޓް ކްލާހުގައި ދަތުރުކުރާ ފަސިންޖަރުންގެ ޑިޕާޗަރ ޓެކްސް އަދި އޭޑީއެފް 240 އެމެރިކާ ޑޮލަރަށް ބޮޑުކުރެވޭނެއެވެ. އަދި ޕްރައިވެޓް ޖެޓުގައި ދަތުރުކުރާ ފަސިންޖަރުންގެ ޑިޕާޗަރ ޓެކްސް އަދި އޭޑީއެފް 480 އެމެރިކާ ޑޮލަރަށް ބޮޑުވާނެއެވެ. 

ދިވެހި ފަސިންޖަރުންގެ ތެރެއިން އިކޮނޮމީ ކްލާހުގައި ދަތުރުކުރާ ފަރާތްތަކަށް މިހާރު ކަނޑައަޅާފައިވާ ޑިޕާޗަރ ޓެކްސް އަދި އޭޑީއެފްގެ އަގު ކަމުގައިވާ 12 އެމެރިކާ ޑޮލަރަށް ބަދަލެއް ނާންނާނެއެވެ. ނަމަވެސް، ބިދޭސީ ފަސިންޖަރުންގެ ތެރެއިން އިކޮނޮމީ ކްލާހުގައި ދަތުރުކުރާ ފަރާތްތަކުގެ ޑިޕާޗަރ ޓެކްސް އަދި އޭޑީއެފް 50 އެމެރިކާ ޑޮލަރަށް އިތުރުކުރެވޭނެއެވެ.

ޑިޕްލޮމެޓިކް އިމިއުނިޓީ އޮންނަ ފަރާތްތަކާއި، ޓްރާންސިޓް ފަސިންޖަރުން، އަދި 2 އަހަރުން ދަށުގެ ކުޑަކުދިން ޑިޕާޗަރ ޓެކްސް ދެއްކުމުން އިސްތިސްނާވާނެއެވެ.