ރާއްޖޭގައި ހިންގަމުން ގެންދާ ބޭރުގެ ބޭންކު ތަކުގެ ބްރާންޗު ތަކަކީ، ދިވެހިންނަށް ފައިދާ ނުކުރާ "ޕޯސްޓް އޮފީސް" ތަކެއް ކަމަށް ސެންޓްރަލް ބޭންކުގެ ގަވަރުނަރު އަހުމަދު މުނައްވަރު ސިފަ ކުރައްވައިފި އެވެ. 

އެމްއެމް ޓީވީގެ ބޮޑު ހަބަރު ޕްރޮގްރާމްގައި ވާހަކަ ދައްކަވަމުން މޯލްޑިވްސް މަނިޓްރީ އޮތޯރިޓީ އެމްއެމްއޭގެ ގަވަރުނަރު މުނައްވަރު ވިދާޅުވީ ރާއްޖޭގައި ހިންގާ ބޭރުގެ ބޭންކު ތަކުގެ ބްރާންޗު ތަކުގެ ސަބަބުން، އަވަށްޓެރި ގަގުމުތަކުގެ ބޭންކުތައް މުއްސަންދިވެގެން ދިޔައިރު، ރާއްޖޭގައި ހިންގާ ބޭންކުތައް ހުރީ ވަރަށް ފަގީރުކޮށް ކަމަށެވެ. 

"ދިވެހި ބޭންކުތައް ފިޔަވާއި ރާއްޖޭގައި ދެންތިބި ބޭންކުތައް ރާއްޖެ ބޭނުން ކުރަމުން މިދަނީ ޕޯސްޓް އޮފީހެއްގެ ގޮތުގައި. މާނަ އަކީ މި ހުރިހާ ރިސޯޓު ތަކަށް ފަންޑު ކުރުމަށް ޓަކައި އެ ބޭފުޅުން ހުރިހާ އެސެޓެއް ކްރިއޭޓް ވެގެން ދަނީ އެހެން ތަންތަނުގައި،" މުނައްވަރު ވިދާޅުވި އެވެ. 

އޭނާ ވިދާޅުވީ ހޮންގް ކޮންގް އެންޑް ޝަންހާއީ ބޭންކް (އެޗްއެސްބީސީ) ވެސް މިހާރު ރާއްޖެ ދޫކޮށްދާއިރު، ބޭންކިން ގާނުނޫ އޮތް އޮތުން އެ ވިޔަފާރި ދާނީ ސްރީލަންކާ އަށް ކަމަށެވެ. ގާނޫނު އޮތްގޮތުން ރާއްޖެ ދޫކޮށް ދިއަސް އެޗްއެސްބީސީ އަށް ވާނެ ގެއްލުމެއް ނެތް ކަމަށް އޭނާ ވިދާޅުވި އެވެ. ރާއްޖޭގައި ހިންގަނީ އެޗްއެސްބީސީގެ ލަންކާގެ ގޮތްޕެކެވެ. 

ގަވަރުނަރު ވިދާޅުވި ގޮތުގައި ބޭންކުތަކުގެ އެސެޓް ރާއްޖެގައި ހިފެހެއްޓުމަށް ޓަކައި ބޭންކުތަކުގެ ކެޕިޓަލް އިތުރުުކުރަން ޖެހެ އެވެ. އޭނާ ވިދާޅުވީ ބޭންކު ތަކުގެ ޕެކިޓަލްގެ ގޮތުގައި ކަނޑައަޅާފައިވާ އަދަދު ތަކަކީ މިހާރަށް ބަލާއިރު މާ ކުޑަ އަދަދުތަކެއް ކަމަށެވެ. 

"މިކަން ހައްލުކުރުމަށް ޓަކައި، އަންނަ އަހަރު އެންމެ ބޮޑު ކަމަކަށް، އަޅުގަނޑު މަސައްކަތް ފަށާނީ އަޅުގަނޑުމެންގެ ބޭންކިން ގާނޫނު އިސްލާގު ވެގެން ދާންޖެހޭނެ، މިހާރު ކެޕިޓަލްގެ ގޮތުގައި ލާފައި ހުރި އަދަދު ތަކަކީ މާ ކުޑަކުޑަ އަދަދުތަކެއް،" އޭނާ ވިދާޅުވި އެވެ. 

މުނައްވަރު ވިދާޅުވީ ރާއްޖޭގެ ބޭންކުތައް މުއްސަނދި ކުރެވޭނީ ރާއްޖޭގައި ހިންގާ ބޭންކުތަނުން ޓޫރިޒަމް އިންޑަސްޓްރީ އަށް ސީދާ ލޯނު ދޫކޮށް، އެ ފައިސާ އަނބުރާ އެ ބޭންކު ތަކަށް ވަދެގެންނެވެ. މިހާރު އޮތް ގޮތުން، ރާއްޖޭގައި ހުންނަ ބްރާންޗު މެދުވެރިކޮށް، ފައިސާ ދަނީ ރާއްޖެ އިން ބޭރަށް ކަން އޭނާ ފާހަގަ ކުރެއްވި އެވެ. 

އެމްއެމްއޭ އިން ބުނީ ރާއްޖެ އަށް އަހަރަކު 4.5 ބިލިއަން ރުފިޔާގެ އާމްދަނީ އެއް ޑޮލަެރުން ލިބޭއިރު، އޭގެތެރެ އިން ރާއްޖޭގެ ބޭންކު ތަކަށް މިދިޔަ އަހަރު ވަދެފައި ވަނީ 1.5 ބިލިއަން ޑޮލަރު ކަމަށެވެ.