ENGLISH

06 އޭޕްރީލު 2025

Advertisement

އަނބިމީހާ މަރާލުމުގެ ކުށުގަ ފިރިމިހާ ޖަލުގައި؛ އަނބިމިހާ ލޯބިވެރިޔާއާއެކު އެހެން އަވަށެއްގައި

05 އޭޕްރީލު 2025

|

ފަޒީލް ޢަބްދުލް ލަތީފު

ސުރޭޝް އަދި އޭނާގެ އަންހެނުން މަލިގޭ--ފޮޓޯ:މައިސޫރުސްޓަރ

އަވައްޓެރި އިންޑިޔާގެ މައިސޫރުގައި، އަނބިމީހާ މަރާލި ކަމުގެ ތުހުމަތުގައި ފިރިމިހާ ދޮޅުއަހަރު ޖަލުގައި ހޭދަކުރިފަހުން އަނބިމީހާ ގަދަވެސަލާމަތުން ދިރިހުއްޓާ ފެނިއްޖެއެވެ.

މިކަން ހިނގާފައިވަނީ 2020 ވަނަ އަހަރު، ސުރޭޝް ނަމަކަށް ކިޔާ 38 އަހަރުގެ މީހަކު އޭނާގެ އަންހެނުން މަލިގޭ ގެއްލިގެން އެސަރަހައްދުގެ ފުލުހަށް މައްސަލަ ހުށަހެޅި ހިސާބުންނެވެ. އޭގެ ފަހުން، ފުލުހުންނަށް އެ ސަރަހައްދުން އަންހެނެއްގެ ކަށިގަނޑެއް ފެނި، އެ ކަށިގަނޑަކީ މަލިގޭގެ ކަށިގަނޑު ކަމަށާއި ސުރޭޝް އޭނާ މަރާލާފައިވާ ކަމަށް ތުހުމަތުކޮށް ކޯޓަށް ދައުވާ ފޯމުު ހުށަހެޅިއެވެ. އޭގެ ފަހުން ފުލުހުން ހުށަހެޅި ހެކިތަކަށް ރިއާޔަތްކޮށް އޭނާ ޖަލަށްލެވުނެވެ.

ކޯޓުން ސުރޭޝް އަކީ އޭނާގެ އަންހެނުންގެ ގާތިލުކަމަށް ނިންމުމުން، ޖަލުގައި އޭނާ ދޮޅު އަހަރެއްހާ ދުވަސް ހޭދަކުރިފަހުން މި މައްސަލަ، ވަރަށް ހައިރާންކުރަނިވި ގޮތަކަށް އަލުން ކޯޓުގެ ސަމާލުކަމަށް ގެނެވުނެވެ. މިހިނގާ އޭޕްރިލް މަހުގެ 1 ވަނަ ދުވަހު ސުރޭޝްގެ ރައްޓެއްސަކަށް، މަރުވެފައިވާ ކަމަށް ފުލުހުން އަދި ކޯޓުންވެސް ނިންމާފައިވާ، އަދި އެމީހަކު މަރާލުމުގެ ކުށްސާބިތުވެގެން ސުރޭޝް ޖަލުގެ ތޭރިތަކުގެ ތެރޭގައި ދުވަސްތައް ގުނަންޖެހިފައިފާ، ސުރޭޝްގެ އަންހެނުން ފެނުނެވެ. ފެނުނުއިރު މަލިގޭ ހުރީ އެހެންފިރިހެނަކާ އެކުގައެވެ. އަދި ގިނަ ދުވަހެއްނުވެ މަލިގޭ ކޯޓަށް ހާޒިރުކުރެވުނެވެ.

ކޯޓުގައި މަލިގޭވަނީ އޭނާ އެހެން ފިރިހެނަކާއެކު ފިލައިގެން އެހެންއަވަށަކަށް ގޮސް، ކައިވެނިކުރިކަމުގައެވެ. އަދި އޭގެފަހުން ސުރޭޝްގެ ހަބަރެއް އޭނާ ނުބަލާ ކަމާއި އަދި ސުރޭޝްއަށްވީ އެއްވެސް ގޮތެއް ނޭނގޭކަމުގައެވެ. ކައިވެންޏަށްފަހު އޭނާ ދިރިއުޅެމުންދާ އަވަށަކީ ސުރޭޝްގެ އަވަށާ މާދުރު ހިސާބެއްނޫން ކަމަށާއި އަދި ފުލުހުން އޭނާ ހޯދަން އެެއްވެސް މަސައްކަތެއް ކޮށްފައިނުވާ ކަމަށްވެސް މަލިގޭ ކޯޓުގައި ބުންޏެވެ.

ސުރޭޝްގެ ވަކީލު މެދުގަ-- ފޮޓޯ:އިންޑިއާ ޓުޑޭ

މައްސަލައާ ގުޅޭގޮތުން ވާހަކަދައްކަމުން ސުރޭޝްގެ ވަކީލުވަނީ މިއީ އެސަރަހައްދުގެ ފުލުހުން ކަނޑައެޅިގެން ގަސްދުގަ ނުހައްގުން ސުރޭޝްއަށްދިން ބޮޑު އަނިޔާއެެއްކަމަށް ބުނެފައެވެ. އަދި ސުރޭޝްގެ އަނބިމިހާ ގެއްލުނުފަހުން އެސަރަހައްދުން އެފެނުނު ކަށިގަނޑާ ސުރޭޝް އާގުޅުވޭނެ އެއްވެސް ހެއްކެއް ނެތްއިރުވެސް ފުލުހުން އެއްވެސްކަހަލަ ރަހުމެއްނެތި، ކަށިގަނޑުގެ ޑީއެންއޭ ނަތީޖާ ލިބުމުގެވެސް ކުރިން ސުރޭޝް އަކީ ގާތިލުކަމަށް ނިންމާ ކޯޓަށް ފައިނަލް ޗާޖު ޝީޓު ހުށަހެޅިކަންވެސް ވަކީލު ފާހަގަކުރިއެވެ.

ޑީއެންއޭ ނަތީޖާ ލިބުނުއިރު މެޗު ނުވުމުން، އެކަން ފާހަގަކޮށް ޑިސްޗާޖު އެޕްލިކޭޝަނެއް ހުށަހެޅުމުން، ކޯޓުން އެކަން ބަލައިނުގަނެ މަލިގޭގެ އާއިލާ މީހުން ހިމެނޭހެން އިތުރުބައެއްގެ ބަޔާން ނެގިއެވެ. ނަމަވެސް ބަޔާންދިން ހުރިހާ ފަރާތަކުން ވެސް ބުނީ މަލިގޭ މަރުނުވާކަމަށާއި އެނާ އެހެން ފިރިހެނަކާއެކު ފިލައިގެން ގޮސްފައިވާ ކަމަށެވެ. ކޯޓުން ފުލުހުންނާ، ޗާޖް ޝީޓުގައި ހުރި އުނިކަންތައްތަކާ ބެހޭގޮތުން ސުވާލުކުރި ނަމަވެސް، އެމީހުންގެ ތަހުގީގު ދިފާއުކޮށް އެ ކަށިތަކަކީ މަލިގޭގެ ކަށިތައްކަމަށާއި ސުރޭޝް އޭނާ މަރާލާފައިވާކަމަށް ތަކުރާރުކޮށް ބުންޏެވެ.

ސުރޭޝްގެ ވަކީލު ބުނީ، ސުރޭޝް އަކީ ގާތިލެެއްނޫންކަން މިހާރު އެންމެނަށްވެސް ޔަގީން ވާނެ ކަމަށެވެ. ނަމަވެސް އެސަރަހައްދުން ފެނުނު ކަށިތަކަކުގެ ހަގީގަތަކީ ކޮބައިކަން ފުލުހުން ސާފު ކޮށްދޭންޖެހޭނެ ކަމަށާއި އަދި ސުރޭޝްގެ މަށްޗަށް އެއްވެސްކަހަލަ އަސާސެއްނެތި މިވަރުގެ ދައުވާއެއް ހުށަހެޅުމުގެ ފަހަތުގައިވާ ސަބަބު ހޯދަންޖެހޭ ކަމުގައެވެ.

ކޯޓުން މިމައްސަލަ ތަހުގީގު ކުރުމުގައި ހަރަކާތްތެރިވި ފުލުހުންނާ ސުވާލުކުމުން އެމީހުންނަށް އެއްވެސް ޖަވާބެއްނުދެވުނެވެ. މިމައްސަލައިގައި ހުރި އުނިކަންކަން ފުރިހަމަކޮށް ރިޕޯޓެއް މިމަހު 17 ގެ ކުރިން ހުށަހެޅުމަށް ބެންގަލޫރުގެ ކޯޓަކުންވަނީ ފުލުހުންނަށް އަމުރު ކޮށްފައެވެ. އަދި އެޔަށްފަހު ކޯޓުން ރަސްމީކޮށް ސުރޭޝްގެ މަށްޗަށް ކުށް ސާބިތުނުވާކަމަށް ހުކުމްކުރާނެއެވެ. ސުރޭޝްގެ ވަކީލުބުނީ ކޯޓުން ހުކުމް ކުރިޔަސް، އެނާގެ މުވައްކިލަށް ކުރިމަތިވި ޖިސްމާނީ އަނިޔާ ތަކާ ނަފްސާނީ ގޮތުން ލިބުނު ގެެއްލުމުގެ ބަދަލު ހޯދުމަށާއި ފުލުހުން ނުހައްގު ދައުވާއެއް ކޮށްފައިވުމާ ގުޅިގެން ހައިކޯޓަށް މައްސަލަ ހުށަހަޅާނެ ކަމުގައެވެ. މީގެ އިތުރުން، އޭނާ ބުނީ ސުރޭޝްގެ އަންހެނުން ގެއްލުނު މައްސަލަ އާ، އެސަރަހައްދުން ފެނުނު ކަށިތަކުގެ މައްސަލަ އެެއްކޮށް ހިންދާލުމަށް ސުރޭޝްގެ މައްޗަށް ދައުވާކުރުމަށް ފުލުހުންގެ ރޭވުމެއް އޮތްތޯ ބެލުމަށް ތަހުގީގުކުރަންޖެހޭ ކަމަށެވެ.

ކިޔުންތެރިންގެ ހިޔާލު