މީގެ ކުރިން، މާލޭގެ މަގުތައް މަތީގައި ބިއްޖެހިފައި ތިބޭ ޒުވާނުން ކޮންމެ ދިމާލަކަށް ނަޒަރު ހިންގައިލި ނަމަވެސް ލޮލުގައި އަޅައިގަނެއެވެ. މިފަދަ ޒުވާނުންގެ އުނދަގުލާ ހެދި މާލޭގެ މަގުތައް މަތީގައި ހިންގާ ބިނގާވެ ނޫޅެވޭ ހިސާބަށް ކަންތައްތައް އޮތީ ގޮސްފައެވެ. މަޝްހޫރު ކޮންމެ ފިހާރައެއްގެ ދޮރުމަތީގައި މިފަދަ ޒުވާނަކު އިނދެއެވެ. ކޮންމެ ދުވަހަކު މެންދުރު ނަމާދު ވަގުތާ ހަމައަށް މިފަދަ ޒުވާނުން މިސްކިތްތަކުގައި ނިދާފައި ތިބެއެވެ.

އިސްލާހުވާނެ ފުރުސަތެއް ނުވަތަ ވަޒީފާއެއް ނުލިބިފައި ތިބޭ ޒުވާނުންނެވެ. މިފަދަ ބައެއް ޒުވާނުންނަކީ ތަފާތު ސަބަބުތަކާހުރެ އާއިލާގެ އެހީތެރިކަމާއި އަޅާލުމުން މަހުރޫމުވެފައިވާ ބައެކެވެ. މަސްތުވާތަކެއްޗަށް ދެވިހިފުމުގެ ސަަަބަބުން މުޖުތަމައުން އެކަހެރިވެ ހަވާސާގައި ތިބި ބައެކެވެ. 

ނިމިދިޔަ ސަރުކާރުތަކުގައި މި މައްސަލަ އޮތީ އިންތިހާހަށް ބޮޑުވެ އާންމުންނަށް ނުރައްކަލަކަށްވެފައެވެ. ރައީސުލްޖުމްހުރިއްޔާ ޑރ. މުޙައްމަދު މުޢިއްޒު ވެރިކަމާ ހަވާލުވެ ވަޑައިގެން، އެމަނިކުފާނުގެ ހަރުދަނާ ސިޔާސަތުތަކާއެކު، މި މައްސަލަ ހައްލުކުރައްވަން މުހިންމު ފިޔަވަޅުތަކެއް ދަނީ އަޅުއްވަމުންނެވެ. މި މަސައްކަތުގެ ނަތީޖާވެސް އެހާމެ ފޮންޏެވެ.

މިހާރަކަށް އައިސް މާލޭގެ މަގުތައްމަތީގައި ބިއްޖެހިފައި ޒުވާނުން ނުތިބެއޭ ބުންޏަސް ދޮގަކަށް ނުވާނެއެވެ. ރައީސްގެ  ސިޔާސަތުތަކާއެކު މިފަދަ ޒުވާނުންގެ ދިރިއުޅުން ވަނީ އަލިކޮށްދެއްވާފައެވެ. މި ފަދަ ޒުވާނުން ފަރުވާދެވި، އަނބުރާ މުޖުތަމައަށް އިއާދަކުރެވޭނެ ނިޒާމު ވަނީ ހަމަޖައްސައިދެއްވާފައެވެ. އަދި އަމިއްލައަށް އިސްލާހުވުމުގެ ފުރުސަތާއި މުޖުތަމައަށް ބޭނުން ހިފޭނެ ފަދަ މީހަކަށްވުމުގެ ފުރުސަތުވެސް މި ސަރުކާރުން ވަނީ ފަހިކޮށްދެއްވާފައެވެ.

މަގުމަތީގައި ވަންނާނެ ތަނެއް ނެތިގެން ސަލާން ޖަހައި އަދި މަސްތުވާތަކެތީގެ ޝިކާރައަކަށްވެފައިވާ މީހުން ބަންދު ކޮށްގެން ފަރުވާ ދިނުމަށް ހޯމްލޭންޑް ސެކިއުރިޓީ މިނިސްޓްރީއިން އިސްނަގައިގެން ވަނީ ހާއްސަ އޮޕަރޭޝަނެއް ފަށްޓަވައިފައެވެ. މި އޮޕަރޭޝަނުގައި މިހާރު ގެނަދަނީ 50 ވަރަކަށް ޒުވާނުންނަށް ފަރުވާދެމުންނެވެ. އެފަދަ ޒުވާނުން ދެނެގަނެ، އެ މީހުންނަށް ފަރުވާ ދިނުމުގެ ހާއްސަ ޕްރޮގްރާމް ފެށީ މިދިޔަ އަހަރުގެ އޮކްޓޯބަރ މަހުގެ 22 ވަނަ ދުވަހުއެވެ. މިއީ މުއްދަތެއް ނެތް ގޮތަށް ކުރިއަށްގެންދާ އޮޕަރޭޝަނެއް ކަމަށް ނޭޝަނަލް ޑްރަގް އެޖެންސީ (އެންޑީއޭ) ގެ ޗެއާޕާސަން ލުބުނާ މުހައްމަދު ޒާހިރު ހުސެއިން ވަނީ ވިދާޅުވެފައެވެ.

ސަރުކާރު ބަދަލުވިއިރު ޑްރަގު ކޯޓުން ފަރުވާ ދިނުމަށް ހުކުމްކޮށްފައި ތިބި އެތައް ސަތޭކަ ބަޔަކު ފަރުވާއަށް ނުގެންދެވި މަގުމަތިވެފައި ތިބި ނަމަވެސް މި ސަރުކާރުން ކުރި މަސައްކަތުގެ ތެރެއިން އެއިން ގިނަ ބަޔަކު ފަރުވާއަށް ގެންދެވިފައިވެއެވެ. އަދި ފަރުވާއަށް ގެންދެވުނު މީހުންގެ ތެރެއިން ވަރަށް ގިނަ މީހުން ފަރުވާ ފުރިހަމަަކޮށްފައިވެއެވެ. 

ފަރުވާ ފުރިހަމަކުރާ މީހުން އަނބުރާ މުޖުތަމައަށް ގެނައުމަށް އެހީތެރިވުމުގެ ގޮތުން އެމީހުންނަށް މަސައްކަތު ހުނަރެއް ދަސްކޮށްދިނުމަށް ހާއްސަ ޕްރޮގުރާމުތަކެއް ސަރުކާރުން ފަށާފައިވެއެވެ. މިހުރިހާ މަސައްކަތެއްގެ ނަތީޖާއެއްގެ ގޮތުން މަގުމަތީގައި ގިނަވެފައި ތިބޭ މަސްތަށް ދެވިހިފާފައިވާ ޒުވާނުންގެ އަދަދު މަދުވެފައިވެއެވެ. 

ޑރ. މުހައްމަދު މުޢިއްޒުގެ ސަރުކާރަކީ ޒުވާނުން ހަރުދަނާކުރުމަށް ވަރަށް ބޮޑު އަހައްމިއްޔަތު ކަމެއް ދޭ ސަރުކާރެކެވެ. ހަމަ މަގުން ކައްސާލައިފައިވާ ޒުވާނުން ހަމަ މަގަށް އަޅުވައި، އެފަދަ ޒުވާނުންގެ ކުރިމަގު އުޖާލާކުރުމަށްޓަކައި މި ސަރުކާރުން އަންނަނީ އެތައް މަސައްކަތްތަކެއް ކުރަމުންނެވެ. އެފަދަ ޒުވާނުން ޤައުމަށް ބޭނުން ހިފޭ ފަދަ ދަރިންތަކަކަށް ހެދުމަކީ މި ސަރުކާރުން ދެކެމުން އަންނަ ހުވަފެނެކެވެ. މިއީ މުޅި މުޖުތަމައަށް ހެޔޮބަދަލު އަންނާނެ ކަމެކެވެ.