މަނިޓަރީ ޕޮލިސީ އާއި އެއްގޮަތަށް ފިސްކަލް ޕޮލިސީ ވެސް ހަރުދަނާ ވާންޖެހޭނެ ކަމަށާއި، އެއް އަތް ޖަހައިގެން މިހާރު ދިމާވެފައިވާ މާލީ މައްސަލަތަކަށް ހައްލު ނުހޯދޭނެ ކަމަށް ސެންޓްރަލް ބޭންކުގެ ގަވަރުނަރު އަހުމަދު މުނައްވަރު ވިދާޅުވެއްޖެ އެވެ.

އެމްއެމް ޓީވީގެ ބޮޑު ހަބަރު" ޕްރޮގްރާމްގައި ރޭ ވާހަކަ ދައްކަވަމުން ގަވަރުނަރު ވިދާޅުވީ ރާއްޖެ އަކީ ވަރަށް ބޮޑަށް ބަޖެޓް ސިޔާސަތަށް ބަރޯސާވެފައިވާ ގައުމެއް ކަމަށާއި، ބަޖެޓް ޑެޕިސިޓް ދެ އަކުރުގެ އަދަދަށް އަރައި، ފައިސާ ޗާޕުކުރުމުގެ ސަބަބުން ފިސްކަލް ސިޔާސަތު އޮތީ ވަރަށް ބޮޑަށް ނުކިއްސަރުވެފައި ކަމަށެވެ. 

"މިދިޔަ ފަސް އަހަރު ތެރޭގައި ބަޖެޓް ސިޔާސަތު އޮތީ އެންމެ ރަނގަޅަކަށެއް ނޫން. ކޮވިޑްގެ ކުރިން އުޅޭނީ ޗާޕުކުރި ފައިސާ ހަ ބިލިއަން، މިދިޔަ ފަސް އަހަރު ތެރޭގައި ގާތްގަނޑަކަށް އަށް ބިލިއަން ރުފިޔާ ޗާޕުކޮށްފައި އެބަހުރި،" މުނައްވަރު ވިދާޅުވި އެވެ. 

މޯލްޑިވްސް މަނިޓްރީ އޮތޯރިޓީ (އެމްއެމްއޭ) އިން އަލަށް އަމަލުކުރަން ފެށި ބޭރު ފައިސާ އާ ގުޅޭ ގަވާއިދަށް އިޝާރާތް ކުރައްވައި، އޭނާ ވިދާޅުވީ ޑޮލަރު މައްސަލަ ހައްލުކުރަން ކުރާ މަސައްކަތުގެ އެންމެ އެދެވޭ ނަތީޖާ ފެންނާނީ ސަރުކާރުން ވެސް ޚަރަދު ކުޑަކޮށް ފިސްކަލް ސިޔާސަތު ހަރުދަނާ ކުރުމަށް ކުރަން ޖެހޭ މަސައްކަތްތައް ކޮށްގެން ކަމަށެވެ. 

"ލިބޭ އެއްޗަކުން ދެކޮޅު ޖެހޭ ގޮތަށް ސިޔާސަތު ބައްޓަން ނުކުރާ ކަމުގައިވާ ނަމަ ހަމައެކަނި، މަނިޓަރީ ޕޮލިސީ އަކުންނެއް ބްލެކް މާކެޓްގެ ރޭޓެއް ކުޑަކުރެވިގެނެއް ނުދާނެ،" މުނައްވަރު ވިދާޅުވި އެވެ. 

އޭނާ ވިދާޅުވި ގޮތުގައި ކޮވިޑް-19 ގެ ފަހުން، ޓޫރިޒަމް އިންޑަސްޓްރީން ބޭންކުތަކަށް މާރުކުރާ ޑޮލަރު މަދުވި އެއް ސަބަބެއް ކަމަށް ބެލެވެނީ، ރަސްމީ ނޫން ގޮތަށް ޑޮލަރު މާރުކުރުމުން ލިބޭ ފައިދާ ބޮޑުވުމެވެ. ބޭރު ފައިސާ އާ ބެހޭ ގަވާއިދުގެ ބޭނުމަކީ ކުރިން ބޭންކުތަކަށް މާރުކުރަމުން ދިޔަ ވަރަށް، ބޭންކުތަކަށް ޑޮލަރު ވަންނާނެ ގޮތެއް ހޯދުން ކަމަށް ގަވަރުނަރު ވިދާޅުވި އެވެ. 

އެމްއެމްއޭ އިން ބުނީ ބޭރު ފައިސާ އިން އަހަރަކު 4.5 ބިލިއަން ޑޮލަރުގެ އާމްދަނީއެއް ރާއްޖެ އަށް ލިބުނު ނަމަވެސް ބޭންކުތަކަށް މިދިޔަ އަހަރު ވެސް ޖަމާކޮށްފައި ވަނީ 1.5 ބިލިއަން ޑޮލަރު ކަމަށެވެ.