ފައިނޭންޝިއަލް ސެކްޓަރ ޖީޑީޕީގެ ނިސްބަތުން ދެގުނަކުރުމަކީ އަމާޒެއްކަމަށް މޯލްޑިވެސް މަނިޓަރީ އޮތޯރިޓީ (އެމްއެމްއޭ)ގެ ގަވަރުނަރު އަހުމަދު މުނައްވަރު ވިދާޅުވެއްޖެ އެވެ. 

ގަވަރުނަރު މިފަދައިން ވިދާޅުވީ އެމްއެމް ޓީވީގެ ބޮޑު ޚަބަރު ޕްރޮގްރާމްގައި ވާހަކަފުޅު ދައްކަވަމުންނެވެ. ދިވެހިރާއްޖޭގެ ފައިނޭންޝިއަލް ސެކްޓަރ ތަރައްޤީވާން ޖެހޭ މިންވަރަށް ތަރައްޤީ ނުވާކަމަށް ވެސް ފާހަގަކުރެއްވި އެވެ. 

އެމްއެމް ޓީވީގެ ބޮޑު ޚަބަރު ޕްރޮގްރާމްގައި ގަވަރުނަރު ވާހަކަފުޅު ދައްކަވަނީ 

މިހާރު ޖީޑީޕީގެ ނިސްބަތުން ރާއްޖޭގެ ފައިނޭންޝިއަލް ސެކްޓަރ ވަނީ 4 ނުވަތަ 5 އިންސައްތައިގައި ކަމަށާއި ކުރިއަށް އޮތް ފަސް އަހަރު ތެރޭގައި ފައިނޭންޝިއަލް ސެކްޓަރ ޖީޑީޕީގެ ނިސްބަތުން ދެގުނަ ކުރުމަކީ އަމާޒެއްކަމަށް ފާހަގަކުރެއްވި އެވެ. 

ޖީޑީޕީގައި ފައިނޭންޝަލްގެ ނިސްބަތް ބޮޑު ކުރުމަށްޓަކައި އޮންޝޯ އާއި އޮފްޝޯ ބޭންކިންގް ވަރުގަދަ ކުރުމާއި އޮފްޝޯއަށް އިންޓަނޭޝަނަލް ފައިނޭންޝިއަލް ސެންޓަރުތައް ތަރައްޤީ ކުރުމަކީ ބޭނުންފުޅުވެލައްވާ ކަމެއް ކަމަށް ވެސް ފާހަގަކުރެއްވި އެވެ. 

ގަވަރުނަރުގެ ވާހަކަފުޅުން ފާހަގަވެގެން ދިޔައީ ދިވެހި ރާއްޖޭގެ ފައިނޭންޝިއަލް ސެކްޓަރ ހަރުދަނާ ކުރެވޭނެ ކަމާއި އެކަން ކުރުމަށް މިހާރުގެ ސަރުކާރުން މުހިންމު ފިޔަވަޅުތަކެއް އަޅަމުންދާކަމެވެ. އަދި ރާއްޖޭގެ ބޭންކްތަކާއި އިންޝޯރެންސް ކުންފުނިތަކުގެ ޕޮލިސީތައް ހަރުދަނާކުރުމަށް މަސައްކަތްކުރަމުންދާކަން ވެސް އެމަނިކުފާނު ފާހަގަ ކުރެއްވިއެވެ.