ބިދޭސީންނާ ގުޅިގެން ފައިސާގެ ނާޖާއިޒު ފައިދާ ހޯދުމުގެ އިތުރުން ގަވާއިދާ ޚިލާފު ކަންތައްތަކެއް ހިންގާ ކަމުގެ ތުހުމަތުގައި މޯލްޑިވްސް އިމިގްރޭޝަން ސާވިސްގެ ފަސް މުވައްޒަފެއްގެ މައްސަލަ ފުލުހުން ތަހުގީގު ކުރަން ފަށައިފިއެވެ. 

މި މަޢުލޫމާތު ހާމަކުރެއްވީ ދާޚިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ އިޙްސާން، އެކްސް މެދުވެރިކޮށް ކުރެއްވި ޕޯސްޓެއްގައެވެ. ވަޒީރު ވިދާޅުވި ގޮތުގައި މި މައްސަލައިގައި ތުހުމަތު ކުރެވޭ ފަރާތްތަކުން ބޭނުންކުރާ އިލެކްޓްރޯނިކް ސާމާނު ހިފެހެއްޓި، އެ ފަރާތްތަކުގެ ދިރިއުޅޭ ތަންތަން ބަލައި ފާސްކުރެވިފައިވެއެވެ.

އަދި މި މައްސަލައިގެ އިތުރު ތަފްސީލުތައް ތަޙުޤީޤު ކުރިއަށްދާ ވަރަކުން ފުލުހުންނާއި ކަމާ ބެހޭ އެހެން އިދާރާތައް ގުޅިގެން ހާމަކުރަމުންދާނެ ކަމަށްވެސް އެމަނިކުފާނު ވިދާޅުވިއެވެ.

ވަޒީރު އިތުރަށް ވިދާޅުވި ގޮތުގައި، ޔުނިފޯމު އެޅި މުއައްސަސާތަކުގެ ތެރޭގައި ތިބެ ޔުނިފޯމުގެ ހުރުމަތް ކަނޑާ، ރައްޔިތުންގެ ކުރިމަތީ މުއައްސަސާތަކުގެ އިތުބާރު ގެއްލުވަމުންދާ ފަރާތްތަކާ ދޭތެރޭ ޤާނޫނީ ގޮތުން އެޅޭ އެންމެ ހަރުކަށި ފިޔަވަޅު އެޅުމަކީ ރައީސުލްޖުމްހޫރިއްޔާ އަންގަވާފައިވާ ކަމެކެވެ.