ރާއްޖޭގެ އިރުން ދެ ކޮޅިގަނޑު އުފެދިފައިވާތީ އަންނަ ބުދަ ދުވަހުން ފެށިގެން ފަސް ދުވަހަށް މޫސުން ގޯސްވާނެ ކަމަށް މޫސުމާ ބެހޭ ގައުމީ އިދާރާ (މެޓް) އިން ލަފާކޮށްފިއެވެ. 

މޫސުމާ ބެހޭ ޤައުމީ އިދާރާއިން ވިދާޅުވީ، ރާއްޖޭގެ އިރުން ބޭ އޮފް ބެންގާލްގައި އުފެދިފައިވާ ކޮޅިގަނޑު ކުރިއަށް 24 ގަޑިއިރުގެ ތެރޭގައި އިތުރަށް ބާރުގަދަވާނެކަމަށް ލަފާކުރެވޭ ކަމަށެވެ. އަދި މި ކޮޅިގަނޑު ދަތުރުކުރަމުންދާނެ ކަމަށް ބެލެވެނީ ހުޅަނގު އުތުރަށް އިންޑިއާގެ ޓެމިލްނާޑޫ އާއި ސްރީ ލަންކާގެ އައްސޭރިފަށާ ދިމާއަށް ކަމަށް މެޓު އޮފީހުން ވިދާޅުވެއެވެ.  

މީގެ ސަބަބުން ރާއްޖޭގެ ހުރިހާ ސަރަޙައްދެއްގެ ކަނޑުތައް ގަދަވާނެކަމަށް ލަފާކުރެވޭކަމުގައި ވެސް މެޓު އޮފީހުން ވިދާޅުވެއެވެ.

މީގެ އިތުރުން މި ދެ ކޮޅިގަނޑުގެ ސަބަބުން މި ހަފުތާ ބުދަ ދުވަހުން ފެށިގެން ރާއްޖޭގެ އެކި ސަރަހައްދުތަކަށް ވައިގަދަވެ ކަނޑު ވެސް ގަދަވާނެ ކަމަށް މެޓުން ލަފާކުރެއެވެ. އެހެންކަމުން ރާއްޖޭގެ ދެކުނުގެ އަތޮޅުތަކަށް 15 މޭލާއި 25 މޭލާ ދެމެދުގެ ބާރުމިނުގައި ވައިޖޭނެކަމަށް ލަފާކުރެވޭ ކަމަށާއި ރާއްޖޭގެ އުތުރާއި މެދުރާއްޖެ ތެރެއަށް ގަޑިއަކު 13 މޭލާއި 23 މޭލާ ދެމެދުގެ ބާރުމިނުގައި ވައިޖެހޭނެކަމަށް ލަފާކުރެވޭ ކަމަށް މެޓް އޮފީހުގެ ބަޔާނުގައިވެއެވެ.

ކުރިއަށް އޮތް ދުވަސްތަކުގައި ކަނޑު ދަތުރުކުރާ ފަރާތްތަކާއި މޫދުގެ އެކި ޙަރަކާތްތައް ބާއްވާ ފަރާތްތަކުން މޫސުމަށް ޚާއްސަ ސަމާލުކަމެއް ދެއްވުމަށް މެޓު އޮފީހުން އިލްތިމާސްކުރައްވައެވެ.