ފަތުރުވެރިކަމުގެ ދާއިރާއިން ރާއްޖެއަށް ލިބުނު އެވޯޑުތަކާ އެކު ޓޫރިޒަމް މިނިސްޓަރ އިބްރާހިމް ފައިސަލް، ރައީސުލްޖުމްހޫރިއްޔާ ޑރ. މުހައްމަދު މުޢިއްޒަށް ތަޢުރީފް ކުރައްވައިފި އެވެ.

ރޭ ބޭއްވި 31 ވަނަ ވޯލްޑް ޓްރެވެލް އެވޯޑްސްއަށް ފަހު އެކްސްގައި ކުރެއްވި ޕޯސްޓެއްގައި މިނިސްޓަރ ފައިސަލް ވިދާޅުވީ މިއީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު، ފަތުރުވެރިކަމާ ބެހޭ ސިނާއަތަށް ގެންގުޅުއްވާ ތަސައްވުރު ދައްކުވައިދޭ ކަމެއް ކަމަށާ އަދި ދެމެހެއްޓެނިވި ފަތުރުވެރިކަމުގެ ސިނާއާތެއް ބިނާ ކުރުމަށް އެމަނިކުފާން ގެންގުޅުއްވާ ސިޔާސަތުތައް ވެސް ދައްކުވައިދޭ ކަމެއް ކަމަށެވެ. އަދި މިއީ ރައީސްގެ އިރުޝާދުގެ ދަށުން މި ދާއިރާއަށް ހޯދުނު ވަރަށް މުހިންމު އަދި ބޮޑު ކާމިޔާބީއެ އްކަމަށް ވެސް މިނިސްޓަރ ވިދާޅުވެފައިވެ އެވެ.

އެއްތިރީސް ވަނަ ވޯލްޑް ޓްރެވެލް އެވޯޑްސްގައި ރާއްޖެއަށް ހަ އެވޯޑު ލިބިފައިވާއިރު އޭގެތެރެއިން އެންމެ ފާހަގަކޮށްލެވެނީ ވޯލްޑް ލީޑިން ޑެސްޓިނޭޝަން އެވޯޑާއި ވޯލްޑް ލީޑިން ގްރީން ޑެސްޓިނޭޝަން އެވޯޑެވެ. އަދި މިއީ ވޯލްޑް ލީޑިން ޑެސްޓިނޭޝަން އެވޯޑު ރާއްޖެ ހާސިލްކުރި ފަސް ވަނަ ފަހަރެވެ.