ހުޅުމާލޭގައި ތަރައްޤީކުރަމުންދާ 4،000 ފްލެޓުގެ މަސައްކަތް އަންނަ އަހަރުގެ ޖުލައި މަހުގެ ތެރޭގައި ނިމޭނެ ކަމަށް ފަހި ދިރިއުޅުން ކޯޕަރޭޝަން (އެފްޑީސީ) އިން މިއަދު ބުނެފިއެވެ.

އެފްޑީސީން ބުނީ، މަސައްކަތް އަވަސްކުރުމަށް ކުރަންޖެހޭ މަސައްކަތްތައް ތާވަލު މުރާޖަޢާކުރަމުން އަންނަ ކަމަށާއި، މަސައްކަތުގެ ބޮޑު ބައެއް މިހާރު ނިމިފައިވާ ކަމަށެވެ.

ހުޅުމާލޭގެ ދެވަނަ ފިޔަވަހީގައި އެފްޑީސީން ދަނީ 32 ޓަވަރު އެޅުމުގެ މަސައްކަތް ކުރަމުންނެވެ. މި ޓަވަރުތަކުން 4،000 އެޕާޓްމެންޓް ދިނުމަށް ހަމަޖެހިފައިވެއެވެ. މި އެޕާޓްމެންޓްތައް ދޫކުރުމަށް ހަމަޖެހިފައިވަނީ ކުރީގެ ސަރުކާރުން ކުރިއަށްގެންދިޔަ "ގެދޮރުވެރިޔާ" ސްކީމްގެ ދަށުން ޝަރުތުހަމަވެ، އެންމެ މަތިން މާކްސް ލިބުނު 4،000 މީހުންނަށެވެ.

އެފްޑީސީގެ 4،000 ފްލެޓު އެޅުމުގެ މަސައްކަތް ކުރަމުން އަންނަނީ އިންޑިއާގެ ކުންފުންޏެއް ކަމަށްވާ ކަލްޕަތާރޫ ޕްރޮޖެކްޓްސް އިންޓަރނޭޝަނަލް ލިމިޓެޑް (ކޭޕީއައިއެލް) އާއި ނެޝަނަލް ބިލްޑިންސް ކޮންސްޓްރަކްޝަން ކޯޕަރޭޝަން (އެންބީސީސީ) އިންނެވެ. މި ދެ ކުންފުންޏާ މަސައްކަތް ހަވާލުކޮށްފައި ވަނީ 2021 ވަނަ އަހަރުއެވެ.

މި ފްލެޓުތައް ތަރައްޤީކުރަނީ ތިން ކޮޓަރި އާއި ދެ ކޮޓަރީގެ އެޕާޓްމެންޓްތައް ހިމެނޭ ގޮތަށެވެ. އަދި ޓަވަރުތަކުގެ ތިރީ ދެ ފަންގިފިލާގައި ކޮމާޝަލް ޔުނިޓުތަކެއް ޤާއިމްކުރުމަށް އެފްޑީސީން ވަނީ ނިންމައިފައެވެ.

އެފްޑީސީން އިތުރަށް ހާމަކުރި ގޮތުގައި، ފްލެޓުތައް އަޅާފައިވާ ސަރަހައްދުގައި ޞިއްޙީ ޚިދުމަތްދޭ މަރުކަޒުތަކާއި ޒަރޫރީ ތަކެތި ލިބޭނެ ފިހާރަތަކާއި ޒުވާނުންގެ ސެންޓަރުތަކާއި އޮފީސް ޖާގަތަކާއި ކެފޭ، ރެސްޓޯރަންޓްތައް ހުންނާނެއެވެ.