ފަލަސްތީނާ ދެކޮޅަށް އިޒްރޭލުން ހިންގާ ޤަތުލް ޢާމްއާ ގުޅިގެން އިސްރާއީލުގެ ރައްޔިތުން ރާއްޖެ އެތެރެ ނުވެވޭނެހެން އެ ޤައުމުގެ ޕާސްޕޯޓު މަނާކުރުމުގެ ކުރިން ފަލަސްތީނާއި އަރަބި ޤައުމުތަކުގެ ލަފައަށް ބަލަންޖެހޭނެ ކަމަށް ޕީއެންސީގެ ޕީޖީ ލީޑަރު އަދި އިނގުރައިދޫ ދާއިރާގެ މެންބަރު އިބްރާހިމް ފަލާހު މިއަދު ވިދާޅުވެއްޖެއެވެ.

އިޒުރޭލުގެ ޕާސްޕޯޓު މަނާކުރުމުގެ ގޮތުން އިމިގްރޭޝަންގެ ޤާނޫނަށް ގެނައި އިސްލާޙާ މެދު ގޮތް ނިންމުމަށް މިއަދު ބޭއްވި 241 ކޮމިޓީގެ ޖަލްސާގައި ފަލާހު ވިދާޅުވީ، މި މައްސަލައާ މެދު ގޮތެއް ނިންމަންވާނީ ވަރަށް ބޮޑަށް މަޝްވަރާ ކުރުމަށް ފަހު މިކަމުން ފަލަސްތީނަށް ކުރަނީ ކޮން ފައިދާއެއްތޯ ބަލާ ހޯދުމަށްފަހުގައި ކަމަށެވެ.

ޕީއެންސީގެ ޕީޖީ ލީޑަރު އަދި އިނގުރައިދޫ ދާއިރާގެ މެންބަރު އިބްރާހިމް ފަލާހު. ފޮޓޯ: ރައްޔިތުންގެ މަޖިލިސް

"މި ކަމުގެ ސަބަބުން އެ ބޭފުޅުންނަށް، އެ ގައުމަށް މިކަމުގައި ކިހާ މަންފާއެއް، ފައިދާއެއް ހުރިތޯ ނުވަތަ އެ ބޭފުޅުންނަށް އިޒްރޭލު ޕާސްޕޯޓު މަނާކުރުމުން ލިބޭނެ ހިތްހަމަޖެހުމާއި އުފާވެރިކަން އޮތްތޯ ބަލަން ޖެހޭ،" ފަލާހު ވިދާޅުވި އެވެ.

އިޒުރޭލުގައި ވެސް މުސްލިމު ބޮޑު އާބާދީއެއް ދިރިއުޅެމުން ގެންދާތީ މި މައްސަލައާ މެދު ގޮތެއް ނިންމުމުގެ ކުރިން އަރަބި ކަރައިގެ ގައުމުތަކުގެ ލަފާ ހޯދަންޖެހޭނެ ކަމަށް ވެސް އޭނާ ވިދާޅުވިއެވެ.

މީގެ އިތުރުން، ޕާސްޕޯޓު މަނާކުރުމުގެ ކުރިން ތަފާތު ހިސާބު އަންދާޒާކޮށް އެއީ ކިހާ އަދަދެއްގެ މުސްލިމުންތޯ ބެލުމަށް 241 ކޮމިޓީއިން ވަނީ ނިންމައިފައެވެ.

މި މައްސަލަ އަންނަ އަހަރުގެ ފެބްރުއަރީ މަހަށް އެއްކޮށް ނިމޭނެ ކަމަށް ސަރުކާރު ހިންގާ މައި ޕާޓީ ޕިއެންސީގެ މެޖޯރިޓީ އޮންނަ ކޮމެޓީއިން ބުނެފައިވެއެވެ.