ކޮޕް ސަމިޓުގައި ކަނޑައެޅި މާލީ އަމާޒަކީ މޫސުމީ މައްސަލަތަކަށް އެކަށޭނަ މިންވަރެއް ނޫންކަމަށް އެންވަޔަރަމެންޓް މިނިސްޓަރ ޠާރިޤު އިބްރާހީމް ވިދާޅުވެއްޖެ އެވެ.

މިނިސްޓަރ މިހެން ވިދާޅުވީ ތިމާވެށީގެ އެންމެ ބޮޑު ބައްދަލުވުން "ކޮޕް-29" ސަމިޓަށް ފަހު އަލްޖަޒީރާ އަށް ދެއްވި ހާއްސަ އިންޓަވިއުއެއްގަ އެވެ.

މޫސުމީ ކަންކަމަށް މާލީ އެހީގެ ގޮތުގައި އަހަރެއްގެ މައްޗަށް 1.3 ޓްރިލިއަން ޑޮލަރު ބޭނުންވާނެކަން އެކި ދިރާސާތަކުން ދައްކާކަން ފާހަގަކުރައްވައި މިނިސްޓަރ ވިދާޅުވީ، މި އަހަރުގެ ކޮޕް 29 ގަައި ނިންމާފައިވަނީ މޫސުމަށް އަންނަ ބަދަލުތަކާ ގުޅިގެން އަހަރަކު 300 ބިލިއަން ޑޮލަރުގެ މާލީ އެހީ ދިނުމަށް ކަމަށެވެ. އޭގެ ކުރިން ނިންމީ 250 ބިލިއަން ޑޮލަރު ދިނުމަށް ކަމަށެވެ. ފާއިތުވެދިޔަ ދެ ހަފްތާއެއްހާ ދުވަހު ކުދި ޖަޒީރާ ގައުމުތަކުން އެކި ބައްދަލުވުންތައް ބާއްވާފައިވާ ކަމަށް ވެސް މިނިސްޓަރު ވިދާޅުވިއެވެ.

މި އިންޓަވިއުގައި މިނިސްޓަރ އިތުރަށް ފާހަގަކުރެއްވީ މިއީ މައްސަލައިގެ ބޮޑުމިނާއަޅައި ބަލާއިރު އެކަށީގެންވާ އަދަދެއް ނޫން ކަމަށެވެ. އެކަމާއި ގުޅިގެން ކުދި ޖަޒީރާ ގައުމުތަކުން ކަންބޮޑުވުން ފާޅުކޮށްފައިވާ ކަމަށް ވެސް މިނިސްޓަރ ޠާރިޤް ފާހަގަކުރެއްވި އެވެ. 

މިނިސްޓަރު ވިދާޅުވި ގޮތުގައި، ކުރިއަށް އޮތް އަހަރުތަކުގައި އަމާޒު ހިފާނީ ދުނިޔޭގެ ގައުމުތަކުގެ މެދުގައި އެއްބާރުލުން އިތުރުކޮށް، އެއްބަސްވެފައިވާ ކަންކަން ތަންފީޒު ކުރުމަށެވެ. އަދި އެކަށޭނަ މިންވަރެއް ކޮޕް 29 ގައި ކަނޑަނޭޅުނަސް، ދެން އޮތް ގޮތަކީ އެ އަދަދު ހޯދުން ކަމަށް މިނިސްޓަރ ވިދާޅުވި އެވެ. ނަމަވެސް، ކޮޕް 30 އަށް ކުރަންވީ ކަންތައްތައް މިފަހަރުގެ ބައްދަލުވުމުން ސާފުވެގެން ގޮސްފައިވާ ކަމަށް މިނިސްޓަރު ވިދާޅުވި އެވެ.

މީގެ އިތުރަށް ވެސް މިނިސްޓަރ ވިދާޅުވީ ކޮޕް-29ގައި ކާބަން މާކެޓް ގާއިމުކުރުމަށް އޮނިގަނޑެއް އެކުލަވާލި ކަމަށެވެ.