ގދ. ތިނަދޫއަށް ސިޓީއެއްގެ ދަރަޖަ ދީފައިވަނީ މައުލޫމާތު އޮޅުވާލައިގެން ކަމަށް ބުނެ ހައި ކޯޓަށް ދުސްތޫރީ މައްސަލައެއް ހުށަހަޅައިފި އެވެ. 

މިދިޔަ ސަރުކާރުން ތިނަދޫއަށް ސިޓީއެއްގެ ދަރަޖަ ދިންއިރު އެރަށުގައި 10،000 މީހުން ވެސް ހަމަނުވާ ކަމަށް ބުނެ، ސިޓީގެ ދަރަޖަ އަތުލުމަށް އެދި، ހައި ކޯޓަށް މައްސަލަ ހުށަހެޅީ އެންވަޔަރަމެންޓް މިނިސްޓްރީގެ ސްޓޭޓް މިނިސްޓަރު އަދި ގާނޫނީ ވަކީލު މުޙައްމަދު ރާޣިބު އަހުމަދު އެވެ.

ރާޣިބު ވިދާޅުވި ގޮތުގައި ތިނަދޫއަށް ސިޓީއެއްގެ ދަރަޖަ ދިނުމުގައި ރަސްމީ އާބާދީ އަކަށް ބަލާފައި ވަނީ ތިނަދޫ ކައުންސިލުން ހިއްސާކުރި ލިޔެކިޔުން ތަކަށް ކަމަށެވެ. އެ ލިޔުން ތަކުގައި ފުށު އަރާ ކަންތައްތައް ވާކަމަށާއި، އެ ލިޔެކިޔުންތަކުގައި މަރުވެފައިވާ މީހުން ހިމަނާފައިވާ ކަމަށް ވެސް އޭނާ ފާހަގަ ކުރެއްވި އެވެ. 

އެރަށަށް ސިޓީއެއްގެ ދަރަޖަ ދިނުމަށް ބޭނުންވާ 10،000 މީހުން ހަމަކުރުމަށް ތަކުރާރުކޮށް އައިޑީކާޑު ބޭނުން ކޮށްފައިވާ ކަމަށާއި، އެވަގުތު މަރުވެފައިވާ 115 މީހުން އާބާދީގައި ހިމަނާފައި ވާކަން ފާހަގަ ކޮށްފައިވެ އެވެ. ޑީއެންއާރުން ހޯދި މައުލޫމާތުތަކުގެ މައްޗަށް ބަލައި އެކަން ފާހަގަ ކުރެވުނު ކަމަށް ވެސް ރާޣިބް ވިދާޅުވިއެވެ. 

ތިނަދޫއަށް ސިޓީއެއްގެ ދަރަޖަ ދިނުމަށް އެދި ތިނަދޫގެ ކައުންސިލުން ލޯކަލް ގަވަމަންޓް އޮތޯރިޓީ (އެލްޖީއޭ) އަށް ސިޓީއެއް ވެސް ފޮނުވާފައިވެ އެވެ.