ރައްޔިތުންގެ މަޖިލިހުގެ އިދާރާގެ އަމީން އާއްމާއި، ކައުންސެލް ޖެނެރަލް އަދި ސާޖެންޓް އެޓް އާމްސްގެ މަގާމުގައި މިހާރުވެސް ތިއްބެވި ބޭފުޅުންގެ މަގާމުތަކަށް އަލުން އައްޔަން ކުރުމަށް މަޖިލީހުގެ އިއްތިފާގުން މިއަދު ފާސްކޮށްފިއެވެ.

މިއަދު ރައްޔިތުން މަޖިލީހުގެ ޖަލްސާގައި، ރައްޔިތުންގެ މަޖިލިސް އިދާރާގެ އަމީން އާއްމު ގެ މަގާމުގައި މިހާރުވެސް ހުންނެވި އަލްއުސްތާޒާ ފާތުމަތު ނިއުޝާ އެމަގާމު ދަމަހައްޓަން 79 މެންބަރުންގެ އިއްތިފާގުން ވަނީ ފާސްކޮށްފައެވެ. 

އަދި ސާޖެންޓް އެޓް އާމްސް، މޭޖަރ ރިޓަޔާޑް، ތޮލްހަތު ހަސަން އެމަގާމަށް އަލުން އައްޔަން ކުރުމަށް 80 މެންބަރުންގެ އިއްތިފާގުން ފާސްކޮށްފައިވާއިރު ކައުންސެލް ޖެނެރަލް، އަލްސްތާޒާ ފާތުމަތު ފިލްޒާގެ މަގާމު ދަމަހައްޓަން ނެގި ވޯޓުގައި 80 މެންބަރުންގެ އިއްތިފާގުން ވަނީ އެ މަގާމު ދަމަހައްޓަން ފާސްކޮށްފައެވެ.

މަޖިލީހުގެ ގަވާއިދު ބުނާގޮތުގައި، ގަވާއިދަށް އަމަލު ކުރަން ފަށާތާ ދެ ދައުރު ހަމަވުމުގެ ކުރިން މަޖިލީހުން އެހެން ގޮތަކަށް ކަނޑަނާޅާހައި ހިނދަކު ހިނގަމުންދާ މަޖިލީހުގެ އަމީންއާންމާއި ކައުންސުލް ޖެނެރަލް އަދި ސާޖެންޓު އެޓް އާމްސްގެ މަގާމަށް މީހުން އައްޔަނު ކުރަންވާނެ ކަމަށެވެ.