ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ތަޞައްވުރަކީ ހުރިހާ ރައްޔިތުންނަށް ރައްކާތެރިކަމާއި ހިމާޔަތް ލިބިދެވޭ އަމާން މާހައުލެއް ގާއިމުކޮށް، އެއްވެސް ފަރުދަކު ބާކީ ނުވާނެހެން އެންމެން ޝާމިލުވެ އުޅޭ އުފާވެރި އޯގާތެރި މުޖުތަމަޢެއް ބިނާކުރުން ކަމަށް އިޖްތިމާޢީ އަދި ޢާއިލީ ތަރައްޤީއާ ބެހޭ ވުޒާރާގެ ވަޒީރު ޑރ. ޢައިޝަތު ޝީހާމް ވިދާޅުވެއްޖެއެވެ. 

މި ތަޞައްވުރާ އެއްގޮތަށް ސަރުކާރުގެ ސިޔާސަތުތަކާއި ވުޒާރާގެ މަސައްކަތްތައް ބައްޓަން ކުރެވިގެން ދަނީ ޢާއިލީ ރައްކާތެރިކަމާއި، އިޖްތިމާޢީ ހަމަޖެހުން ޤާއިމު ކުރުމާއެކު، އެކި ބާވަތުގެ އަނިޔާ ލިބިފައިވާ ފަރާތްތަކަށް ބޭނުންވާ ހިމާޔަތާއި ރައްކާތެރިކަން ފޯރުކޮށް ދެވޭނެ ނިޒާމެއް ޤާއިމު ކުރުމަށް ކަމަށް ވަޒީރު ވިދާޅުވިއެވެ.

މިގޮތުން ވުޒާރާއިން ކުރިއަށް ގެންދާ "އިބަމަ" ޕްރޮގްރާމްގެ ދަށުން މިއަހަރުގެ މިހާތަނަށް ރާއްޖޭގެ 5 އަތޮޅެއްގެ 37 ރަށެއްގައި އިބަމަ ޤާއިމުކޮށް 194 ހިއްސާދާރުން ތަމްރީނު ކުރެވިފައިވާ ކަމަށާއި އަދި "ހާލު ކިހިނެއް؟" ޕްރޮގްރާމްގެ ދަށުން 12 އަތޮޅެއްގެ 53 ރަށެއްގައި މި ޕްރޮގްރާމް ފަށައި، 22 ރަށެއް އެއްކޮށް ނިންމާލެވި، މިހާތަނަށް ޖުމުލަ 8027 ގޭބިސީއަށް ޒިޔާރަތްކުރެވި ޢާއިލާތަކުގެ ހާލު ބެލިފައިވާ ކަމަށްވެސް ވަޒީރު ހާމަކުރެއްވިއެވެ.

މީގެ އިތުރުން ގެވެށި އަނިޔާގެ މައްސަލަތައް ރިޕޯޓްކުރުމަށް 24 ގަޑިއިރު ޚިދުމަތްދޭ ހެލްޕްލައިނެއް ޤާއިމުކުރެވި، ގެވެށި އަނިޔާގެ ޝިކާރައަކަށްވާ ފަރާތްތަކަށް ވަގުތީ ގޮތުން ރައްކާތެރިކަން ފޯރުކޮށްދޭ އިތުރު 3 މަރުކަޒެއް ރާއްޖޭގެ 3 ސަރަހައްދެއްގައި ޤާއިމްކުރުމުގެ މަސައްކަތް ފެށިފައިވާ ކަމަށްވެސް ވިދާޅުވިއެވެ.

އަނިޔާ ލިބޭ ފަރާތްތަކަށް އަވަސް މިނެއްގައި ފެންވަރު ރަނގަޅު ޚިދުމަތްތައް ލިބޭނެ އިންތިޒާމް ހަމަޖެއްސުމަކީ ސަރުކާރުގެ އެންމެ ބޮޑު އެއް އަމާޒު ކަމަށާއި، މިކަމަށްޓަކައި ގެވެށި އަނިޔާ ހުއްޓުވުމުގެ ޤާނޫނަށް ގެންނަންޖެހޭ އިސްލާހުތައް ގެނައުމުގެ މަސައްކަތްތައް ފެށިފައިވާ ކަމަށްވެސް ވަޒީރުވަނީ ވިދާޅުވެފައެވެ.