އެންޓި ކޮރަޕްޝަން ކޮމިޝަން (އޭސީސީ)ގެ ނައިބު ރައީސް އަބްދުއް ސަލާމް އާއި އެ ކޮމިޝަންގެ މެންބަރު ތޯހާ މުހައްމަދު، މަގާމުން މިއަދު އިސްތިއުފާ ދެއްވައިފިއެވެ. 

ނުފޫޒަށް ލެނބުމާއި ސުލޫކީ މައްސަލަތަކަކާ ގުޅިގެން ކަމަށް ބުނެ، މަޖިލީހުގެ ކޮމެޓީން ވަނީ އޭސީސީ އާއި އީސީގެ މެމްބަރުން ތަކެއް ވަކިކުރަން ނިންމައިފައެވެ. އޭގެ ތެރޭގައި އޭސީސީގެ ނައިބު ރައީސް އަބްދުލް ސަލާމާއި މެންބަރު ތޯހާ މުހައްމަދު ހިމެނިވަޑައިގަންނަވަ އެވެ. 

އެސީސީގެ ނައިބު ރައީސް އަދި މެމްބަރު ތޯހާ އިސްތިއުފާ ދެއްވާފައިވަނީ މިއަދުގެ މަޖިލީހުގެ ތަޅުމުގައި އިތުބާރު ނެތްކަމުގެ ވޯޓު ނަގަން ތާވަލްކޮށްފައި ވަނިކޮށެވެ.

ދެ ބޭފުޅުން ރައީސް އޮފީހަށް ފޮނުއްވި ސިޓީގައި ވަނީ ޒިންމާތައް މިނިވަންކަމާއި ނަޒާހަތްތެރި ކަމާއެކު ގާނޫނު އަސާސީ އަދި ގާނޫނުގައި ބުނާ ގޮތަށް ތެދުވެރިކަމާއި އިހްލާސްތެރިކަމާއެކު ކުރަމުން ދަނިކޮށް، އެއްވެސް އަސާސެއް ނެތް ދޮގު ތުހުމަތުތަކެއް ކޮށްފައިވާ ކަމަށެވެ. އަދި އިތުބާރު ނެތް ކަމުގެ މައްސަލަ ހުށަހެޅުމަކީ ގާނޫނުން އޭނާއަށް ހަވާލުކޮށްފައިވާ ޒިންމާތައް މިނިވަންކަމާ އެކު އަދާކުރަން ހުރަސް އެޅުމުގެ ގޮތުން ކުރި ކަމެއް ކަމަށް އެސިޓީގައި ބަޔާންކޮށްފައިވެއެވެ. އަދި އޭސީސީގެ ޒިންމާތައް މިނިވަންކަމާ އެކު އަދާކުރެވޭނެ މާހައުލެއް އޮތް ކަމަށް ނުފެންނާތީ އިސްތިއުފާ ދެއްވަން ނިންމެވީ ކަމަށް ވެސް ރައީސް އޮފީހަށް ފޮނުވި ސިޓީގައި ބަޔާންކޮށްފައިވެއެވެ. 

މީގެއިތުރުން، މިއަދު މަޖިލީހުގެ ތަޅުމުގައި އެދެބޭފުޅުންގެ މައްސަލައާއި ބެހޭގޮތުން ބަހުސްކޮށްފައިވެއެވެ. އެގޮތުން، މިނިވަން މުއައްސަސާތަކުގެ ކޮމިޓީން ސަލާމް އާއި ތޯހާގެ މައްސަލަ ދިރާސާކޮށް ނިންމި ގޮތުގެ ރިޕޯޓް މަޖިލީހަށް ހުށަހަޅުއްވަމުން ގުރައިދޫ ދާއިރާގެ ޕީއެންސީ މެންބަރު ހުސައިން ރިޒާ ވިދާޅުވީ އެ ދެ މެންބަރުންގެ މައްސަލަ ދިރާސާ ކުރުމުގެ ތެރޭގައި ގާނޫނާ ހިލާފު ގިނަ ކަންތައްތަކެއް ކޮށްފައިވާކަން ފާހަގަ ކުރެވުނު ކަމަށެވެ.

އެންޓި ކޮރަޕްޝަން ކޮމިޝަން (އޭސީސީ)ގެ ނައިބު ރައީސް އަބްދުއް ސަލާމް އާއި މެމްބަރު ތޯހާ އިސްތިއުފާ ދެއްވުމާ އެކު، އޭސީސީގައި މިހާރު ތިއްބަވާނީ އެ ކޮމިޝަންގެ ރައީސް އާދަމް ޝާމިލް އާއި މެމްބަރު ޝިޔާމާ މުހައްމަދާއި ޝަޒްނާ ހާޝިމެވެ.