ބައިނަލްއަޤްވާމީ ފެންވަރުގެ މުބާރާތްތައް ބޭއްވޭ ގޮތަށް ބްރިޖު ޕްލެޓްފޯމު އަލުން ހެދުމަށްޓަކައި، އެ ތަން ރޫޅާލަން ފަށައިފިއެވެ. މި މަޝްރޫޢުގެ ދަށުން ސާފިން އާއި ބޮޑީބޯޑިން ސްޓޭޑިއަމެއް ތަރައްގީކުރުމަށް ވަނީ ނިންމާފައެވެ.

ސްޕޯޓްސް މިނިސްޓްރީގެ މީޑިއާ އޮފިޝަލެއް މަޢުލޫމާތު ދެއްވިގޮތުގައި، މި މަޝްރޫޢު ކުރިއަށް ގެންދަނީ ހޮންގް ކޮންގުގެ ރޯޓައިމް އިންޖިނިއަރިން އެންޑް ޓެކްނޯލޮޖީ ނަމަކަށް ކިޔާ ކުންފުންޏަކާ ހަވާލު ކޮށްގެންނެވެ. މި މަޝްރޫޢުގެ އެއްބަސްވުމުގައި މިދިޔަ އޭޕްރީލް މަހު މިނިސްޓްރީ އާއި އެ ކުންފުންޏާ ދެމެދު ވަނީ ސޮއިކޮށްފައެވެ. ނަމަވެސް، މަސައްކަތް ހަވާލުކުރި އަގު އަދި ހާމަކޮށްފައެއް ނުވެއެވެ.

މިހާރު ބްރިޖު ފްލެޓުފޯމު ރޫޅާލުމުގެ މަސައްކަތް ފަށައި، އެ ތަން ހިޔާ ކޮށްފައި ހުރި ޓިނުތަކާއި ސިޑިބަރިތައް ވަނީ ނަގާފައެވެ. އެހެންނަމަވެސް، ފްލެޓުފޯމްގެ އަމަލީ މަސައްކަތް ފަށައި ނިންމަން ދީފައިވާ މުއްދަތެއް އަދި ސާފެއް ނުވެއެވެ.

ސްޕޯޓްސް މިނިސްޓަރު އަބްދުﷲ ރާފިއު ކުރިން ވިދާޅުވެފައިވަނީ ބޮޑީބޯޑިން އާއި ސާފިން ސްޓޭޑިއަމެއްގެ އެންމެ ބޮޑު ބޭނުމަކީ ރާއްޖޭގައި އިންޓަނޭޝަނަލް މުބާރާތްތައް ބޭއްވުމުގައި ދިމާވާ ދަތިތަކަށް ހައްލެއް ހޯދުން ކަމަށެވެ.

ފާއިތުވި އަހަރު ތަކުގައި ރާއްޖޭގައި ވަނީ ސާފިން އަދި ބޮޑީ ބޯޑިންގެ އިންޓަނޭޝަނަލް މުބާރަތްތަކެއް ބާއްވާފައެވެ. މީގެ ތެރޭގައި 2022 އަދި 2023 ވަނަ އަހަރު އިންޓަނޭޝަނަލް ބޮޑީބޯޑިން ކޯޕަރޭޝަން (އައިބީސީ)ގެ ވޯލްޑް ޓުއާގައި "ވިޒިޓް މޯލްޑިވްސް ޕްރޯ" ހިމެނެއެވެ.

ކުރީގެ ރައީސް އަބްދުﷲ ޔާމީންގެ ވެރިކަމުގައި ސިނަމާލެ ބްރިޖުގެ މަޝްރޫއު ކުރިއަށްދާ ގޮތް ބެލުމަށް ލޮނުޒިޔާރަތްކޮޅުގައި ހަދާފައިވާ މި ޕްލެޓްފޯމަށް އަށް މިލިއަނަށް ވުރެ ގިނަ ރުފިޔާ ހޭދަކޮށްފައިވާކަން ފާހަގަކުރެވެއެވެ. މި ހޭދަ ކޮށްފައިވަނީ ނިއުޕޯޓް ހިންގާ ކުންފުނި، ސްޓްރާޑާއިންނެވެ.