މަސްވެރިކަން ރާވައި، ހިންގައި، ބެލެހެއްޓުމުގައި ލައިސަންސިން ނިޒާމެއް ޤާއިމުކުރުމަށް މިނިސްޓްރީ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރުން ނިންމައިފިއެވެ.

މި ނިޒާމުގެ މައިގަނޑު މަޤްޞަދަކީ މަސްވެރިކަމުގައި ހަރަކާތްތެރިވާ ފަރާތްތަކާއި، އިޤްތިޞާދީ ގޮތުން މަސްވެރިކަމުގެ ވަސީލަތްތަކަށް ބަރޯސާވާ ފަރާތްތައް ދެނެގަތުމާއި، މަސްވެރިކަމުގެ ތަފާސްހިސާބު އެއްކޮށް ބެލެހެއްޓުމެވެ.

ފިޝަރީޒް މިނިސްޓްރީގެ ސީނިއަރ އޮފިޝަލަކު މަޢުލޫމާތު ދެއްވިގޮތުގައި، މި ނިޒާމުގެ ސަބަބުން މަސްވެރިކަމުގެ ސިނާޢަތް ތަރައްޤީކުރުމަށާއި މަސްވެރިންނަށް ފޯރުކޮށްދޭ ޚިދުމަތްތައް އެކަށީގެންވާ ގޮތެއްގައި ފޯރުކޮށްދިނުމަށް ބޭނުންވާ މަޢުލޫމާތު ލިބިގެންދާނެއެވެ. އަދި މިއީ މަސްވެރިންނާއި މަހާއި މަހުގެ އުފެއްދުންތައް ތައްޔާރުކުރާ ފަރާތްތަކުގެ ޙައްޤުތައް ރައްކައުތެރިކޮށްދީ، އިޖުތިމާޢީ އަދި އިޤްތިޞާދީ ރައްކާތެރިކަން ކަށަވަރުކޮށްދިނުމަށް އެޅޭ މުހިންމު ފިޔަވަޅެއްކަމުގައި އޭނާ ވިދާޅުވިއެވެ.

މި ނިޒާމުގެ ދަށުން، މަސްވެރިކަންކުރާ އުޅަނދުފަހަރާއި، އެ އުޅަނދުތަކުގައި ހަރަކާތްތެރިވާ ކެޔޮޅުންނާއި ފަޅުވެރިންގެ މަޢުލޫމާތު އަދި މަހުގެ އުފެއްދުންތައް އުފައްދާ ތަންތަނުގެ މަޢުލޫމާތު ބެލެހެއްޓޭނެއެވެ. މިއީ ދިވެހިރާއްޖޭގައި ކުރެވޭ މަސްވެރިކަމަކީ ބައިނަލްއަޤްވާމީ ފެންވަރުގައި ބަލައިގަންނަ މަސްވެރިކަމަކަށް ހެދުމަށް އެޅޭ މުހިންމު ފިޔަވަޅެއްކަމަށް ވެސް މިނިސްޓްރީން ފާހަގަކުރެއެވެ.

އެންމެ ފުރަތަމަ މަރުޙަލާއެއްގެ ގޮތުން، އިހީގެ މަސްވެރިކަމާއި، އިހީގެ މަސްވެރިކަމުގެ ވިޔަފާރީގެ ހަރަކާތްތައް މޮނިޓަރކޮށް ބެލެހެއްޓުމަށްޓަކައި ވިޔަފާރި ބޭނުމަށް އިހީގެ މަސްވެރިކަންކުރާ އުޅަނދުފަހަރު ލައިސަންސިން ނިޒާމެއްގެ ތެރެއަށް ފެއްތޭނެ ކަމަށް މިނިސްޓްރީން ބުނެއެވެ. މި ކަންކަމާ ގުޅޭ އިތުރު ތަފްސީލު އިހީގެ މަސްވެރިކަން ރާވައި، ހިންގައި، ބެލެހެއްޓުމާބެހޭ ގަވާއިދުގައި ހިމެނޭނެ ކަމަށް ވެސް މިނިސްޓްރީން މަޢުލޫމާތު ދީފައިވެއެވެ.