މި އަހަރު އަލަށް 600 އަށްވުރެ ގިނަ ދަރިވަރުން މުދައްރިސްކަން ކިޔަވަން ފަށާފައިވާ ކަމަށް ތަޢުލީމީ ކަންތައްތަކާ ބެހޭ ވަޒީރު ޑރ. އިސްމާޢީލް ޝަފީޢު ވިދާޅުވެއްޖެއެވެ.

މިއީ ވޭތުވެދިޔަ 10 އަހަރާ އަޅާބަލާއިރު އިތުރު އަދަދެއްކަން ވަޒީރު ފާހަގަކުރެއްވިއެވެ.

ވަޒީރު ވިދާޅުވީ، ފާއިތުވި އެއް އަހަރު ދުވަހުގެ ތެރޭގައި މުދައްރިސުންނަށް ދޭންޖެހޭ ގަދަރާއި އިޙްތިރާމް އަލުން އަނބުރާ ހޯދައިދީފައިވާ ކަމަށެވެ. އެގޮތުން މިދިޔަ އެއް އަހަރުގެ ތެރޭގައި އެއްވެސް މުދައްރިސަކަށް ނުވަތަ ޕްރިންސިޕަލަކަށް ފިޔަވަޅެއް އަޅާފައި ނުވާ ކަމަށް ވިދާޅުވިއެވެ.

ތަޢުލީމީ ދާއިރާއަށް މިހާރުން މިހާރަށް 2،400 އަށްވުރެ ގިނަ މުދައްރިސުން ބޭނުންވާކަން ފާހަގަކުރައްވާ ވަޒީރު ވިދާޅުވީ، ޕްރައިމަރީ މުދައްރިސުންގެ ގޮތުގައި 250 މުދައްރިސުން ބޭނުންވާ ކަމަށެވެ. މި ދަތިކަމަށް ޙައްލެއް ހޯދުމުގެ ގޮތުން މުދައްރިސުން ތަމްރީނުކުރުމުގެ ޤައުމީ ޕްރޮގްރާމެއް ވަނީ ފަށައިކަން ވަޒީރު ފާހަގަކުރެއްވިއެވެ.

މި ޕްރޮގްރާމްގެ ދަށުން 135 ދަރިވަރަކަށް ސްކޮލަރޝިޕް ދީފައިވާ ކަމަށާއި، ކޮންމެ އަހަރަކު މަދުވެގެން 150 ދަރިވަރުން ތަމްރީނު ކުރުމަކީ ސަރުކާރުގެ އަމާޒެއް ކަމަށް ވަޒީރު ވިދާޅުވިއެވެ. މި ޕްރޮގްރާމްގައި ބައިވެރިވާ ދަރިވަރުންނަށް މަހަކު 1،500 ރުފިޔާގެ އެލަވަންސެއް ދިނުމަށް ވަނީ ހަމަޖައްސައިފައެވެ.

މުދައްރިސުން ތަމްރީނުކުރުމަށް ހަމަޖެހިފައިވަނީ މުދައްރިސުން ލިބުން ދަތިވާ މާއްދާތަކާއި ރަށްތައް ބަލައިގެން، އެކަމަށް ޙައްލެއް އަންނާނެ ފަދަ ގޮތަކަށް ކަމަށް ތަޢުލީމީ ކަންތައްތަކާ ބެހޭ ވުޒާރާއިން ވިދާޅުވެފައިވެއެވެ.