ރާއްޖޭގައި ފުޅާދާއިރާއެއްގައި ހަށިވިއްކުމުގެ ވިޔަފާރިކުރަމުންދިޔަ 6 ބިދޭސީއަކު އިމިގްރޭޝަނުން އަތުލައިގެންފިއެވެ. 

އިމިގްރޭޝަނުން މިއަދު އެކްސް ގައި ކުރި ޕޯސްޓެއްގައި ބުނީ، ފަސް މައްސަލައަކާއި ގުޅިގެން ބިދޭސީ ފަސް އަންހެނަކު އަދި އެޖެންޓުންގެ ގޮތުގައި މަސައްކަތް ކުރަމުންދިޔަ ބިދޭސީ ދެ ފިރިހެނަކު އިމިގްރޭޝަންގެ ބެލުމުގެ ދަށަށް ގެނެވިފައިވާ ކަމަށެވެ. 

އިމިގްރޭޝަންގެ ބެލުމުގެ ދަށަށް ގެންދިޔަ ހަތް މީހުންގެ ތެރެއިން ރާއްޖެ އަނބުރާ ނާދެވޭ ގޮތަށް އެފްރިކާ ދެ މީހުންނާއި ރަޝިޔާގެ އަންހެނަކު ޑީޕޯޓުކޮށްފައި ވާއިރު، ބާކީ ހަތަރު ބިދޭސީން ޑީޕޯޓް ކުރެވެންދެން މިވަގުތު ތިބީ އިމިގްެރޭޝަންގެ ބަންދުގައެވެ. 

މީގެ އިތުރުން، މިދިޔަމަހުވެސް ރާއްޖޭގައި ހަށިވިއްކަމުންދިޔަ ބިދޭސީންތަކެއް ވަނީ އަތުލައިގެނަފައެެވެ. ހެންވޭރު ގެއެއްގައި ހިންގާ ސަރާ ސެލޫން އެންޑް ސްޕާ ކޯޓު އަމުރެއްގެ ދަށުން ބަލައި ފާސްކޮށް 5 މީހަކުވަނީ ހައްޔަރުކޮށްފައެވެ. 

އެ ތަނުގައި ހަށިވިއްކާ ކަމަށް ފުލުހުންގެ އިންޓެލިޖެންސަށް ލިބުނު މައުލޫމާތަކާ ގުޅިގެން މި މަހުގެ 5 ވަނަ ދުވަހު ހިންގި މި އޮޕަރޭޝަނުގައި ހައްޔަރު ކުރީ ދިވެހި ފިރިހެނަކާއި ތައިލޭންޑް ހަތަރު އަންހެނުންނެވެ.

ރައީސް ޑރ. މުހައްމަދު މުއިއްޒު މަގާމާ ހަވާލުވެވަޑައިގެންނެވި ދުވަހުން ފެށިގެން، ގަވާއިދާ ހިލާފަށް ރާއްޖޭގައި އުޅޭ ބިދޭސީން ހުއްޓުވަން އިމިގްރޭޝަނާއި ފުލުހުން ގުޅިގެން ހިންގަމުން އަންނަ އޮޕަރޭޝަންތަކުގައި، އެކި މައްސަލަތަކުގައި މިހާތަނަށް 5،000 އެއްހާ ބިދޭސީން ވަނީ ޑީޕޯޓްކޮށްފަ އެވެ.