ރާއްޖެ ސަރަހައްދުގައި ޤަވާއިދާއި ޙިލާފަށް ހަރަކާތްތެރިވަމުންދިޔަ ސްރީލަންކާގެ ބޯޓަކުން ބައި ޓަނެއްހާ މަސްތުވާތަކެތި އަތުލައިގެންފިއެވެ.

މި ބޯޓު އަތުލައިގެންފައި ވަނީ ރޭގެ ވަގުތެއްގައި އެމްއެންޑީއެފުންނެވެ. ބޯޓު އަތުލައިގަތުމަށްފަހު ރޭ ކުޅުދުއްފުށި ސިޓީގެ ބަނދަރަށް ގެންގޮސްފައިވާ ކަމަށް ފުލުހުން ވިދާޅުވެއެވެ.

ނޫސްވެރިންނަށް މަޢުލޫމާތު ދެއްވަމުން ކޮމިޝަނަރ އޮފް ޕޮލިސް އަލީ ޝުޖާޢު ވިދާޅުވީ ހޮނިހިރު ދުވަހުގެ ރޭ ދަންވަރު 12:45 ހާއިރު މަކުނުދޫ ބޭރުން އަތުލައިގެންފައިވަނީ ސްރީލަންކާއަށް ނިސްބަތްވާ މަސްބޯޓެއް ކަމަށެވެ. އެ ބޯޓު ހުއްޓުވައި ކުޅުދުއްފުށި ބަނދަރަށް ގެންދިއުމުން ކުޅުދުއްފުށީ ސިޓީގެ ފުލުހުންނާއި އެމްއެންޑީއެފް ކޯސްޓު ގާޑުން އާދީއްތަ ދުވަހުގެ ހެނދުނު ބޯޓު ބަލައި ފާސްކޮށްފައިވާކަމަށް ވެސް ކޮމިޝަނަރ ވިދާޅުވިއެވެ.

ކޮމިޝަނަރ ވިދާޅުވީ ބޯޓު ބަލައި ފާސްކުރިއިރު 468.6 ކިލޯ ނުވަތަ ގާތްގަނޑަކަށް ބައި ޓަނުގެ މަސްތުވާތަކެތި ފެނިފައިވާ ކަމަށެވެ. އަދި އޭގެތެރޭގައި 344 ކިލޯ ކްރިސްޓަލް މެތު އަދި 124.6 ކިލޯގެ ކޮކެއިން ހިމެނޭކަމަށް ވެސް ކޮމިޝަނަރު ވިދާޅުވިއެވެ.

މި ބޯޓުގައި ތިބީ ފަސް ފަޅުވެރިން ކަމަށާއި އެ އެންމެންނަކީ ވެސް ސްރީލަންކާގެ ފިރިހެނުންކަމަށް ވެސް ކޮމިޝަނަރު ވިދާޅުވިއެވެ.