ދައުލަތުގެ ބެލުމުގެ ދަށުގައި ތިބި 54 ކުއްޖަކު މިހާތަނަށް އާއިލާތަކާ ޙަވާލުކޮށްފައިވާ ކަމަށް އިޖުތިމާޢީ އަދި ޢާއިލީ ތަރައްޤީއާ ބެހޭ ވަޒީރު ޑރ. ޢާއިޝަތު ޝިހާމް ވިދާޅުވެއްޖެއެވެ.

ސަރުކާރަށް 1 އަހަރު ފުރުމާ ގުޅިގެން ޕީއެސްއެމް ނިއުސްއިން ގެނެސްދިން "ހަފްތާ 52" ގެ ޚާއްސަ ޕްރޮގްރާމެއްގައި ވާހަކަފުޅު ދައްކަވަމުން ވަޒީޅުވީ، މި ޕްރޮގްރާމަކީ ކޮންމެ ކުއްޖަކީވެސް އާއިލީ ލޯތްބާއި އޯގާތެރިކަމުގެ ތެރެއިން ބޮޑުވާ ކުއްޖަކަށްވުމުގެ ފުރުޞަތު ދިނުމަށް ސަރުކާރުން ގެންގުޅުއްވާ ސިޔާސަތުގެ ދަށުން ފެއްޓެވި މަސައްކަތެއް ކަމަށެވެ. 

ވަޒީރު ވިދާޅުވި ގޮތުގައި، މި ޕްރޮގްރާމްގެ ދަށުން ދައުލަތުގެ ބެލުމުގެ ދަށުގައި ތިބި ކުދިން އެ ކުދިންގެ އަމިއްލަ އާއިލާއާ ޙަވާލުކުރުމާއި، އަދި ޙަވާލުވާނެ އާއިލާއެއް ނެތް ކުދިންނަށް އާއިލާއެއް ހޯދައިދިނުމުގެ މަސައްކަތް ހިމެނެއެވެ. މިގޮތުން، މިދިޔަ އެއް އަހަރުގެ ތެރޭގައި 50 އަށްވުރެ ގިނަ ކުދިންނަށް އާއިލާއެއް ހޯދައި ދެވިފައިވާ ކަމަށް ވަޒީރު ފާހަގަކުރެއްވިއެވެ.

ޑރ. ޢާއިޝަތު ޝިހާމް އިތުރަށް ވިދާޅުވި ގޮތުގައި، ފޯސްޓަރ ކުރާ ކުދިން ބެލުމަށް ދައުލަތުން އެހީވުމުގެ ގޮތުން، އެފަދަ ކުދިންގެ ޚަރަދުތައް ބެލެހެއްޓުމަށް 5000 ރުފިޔާގެ އެލަވަންސެއްވެސް ދެމުންދެއެވެ. އަދި ކުދިން އަނބުރާ އާއިލާތަކާ ޙަވާލުކުރާއިރު، އާއިލާ ތެރޭގައި އަމާން މާޙައުލެއް ޤާއިމު ކުރުމަށް ބޭނުންވާ އެހީތެރިކަން ވެސް ވުޒާރާގެ ތެރެއިން ފޯރުކޮށްދެއެވެ.