ލޯބިވެރިޔާގެ ބަރަހަނާ މަންޒަރުތަކެއް ސޯޝަލް މީޑިއާގައި ލީކުކޮށްލާނެ ކަމަށް ބުނެ ބިރު ދެއްކި ފުލުސްމީހާ (ފޮޓޯ)ގެ ބަންދުގެ މުއްދަތަށް 10 ދުވަސް އިތުރުކޮށްފި އެވެ.

މި މައްސަލާގައި މި މަހު 14 ވަނަ ދުވަހު ހައްޔަރުކުރީ، އއ.މަތިވެރި، ފަޒާ، ޒައިދާން މުހައްމަދު (19އ) އެވެ. ޒައިދާނަކީ މަތިވެރި ޕޮލިސް ސްޓޭޝަނުގައި މަސައްކަތް ކުރަމުންދާ ރޭކްރޫޓް ޕޮލިހެކެވެ.

ކްރިމިނަލް ކޯޓުން މިއަދު ނެރުނު އަމުރެއްގައި ބުނީ، ޒައިދާނަށް ތުހުމަތު ކޮށްފައިވާ ކުށް އޭނާ ކުރިކަމަށް ތުހުމަތު ކުރެވޭ މިންވަރަށް ހެކި ހުށަހަޅާފައިވާ ކަމަށެވެ. އެގޮތުން ފޮޓޯތައް ލީކް ކޮށްލާނެ ކަމަށް ބުނެ ބިރު ދެއްކުމުގެ ކަންކަން ހިނގާފައިވާ ކަމުގެ ހެކި އެ ކޯޓަށް ހުށަހަޅާފައިވާ ކަމަށް އެ އަމުރުގައި ބުނެފައިވެ އެވެ.

އަދި މި މައްސަލައިގެ ހެކި ނައްތާލުމަށް ފޯނު ނައްތާލައިފައިވާ ކަމަށް ފުލުހުން ތުހުމަތު ކޮށްފައިވެ އެވެ. ކޯޓުން ނެރުނު އަމުރުގައި ބުނީ، އެކަމަށް ބާރުދޭ ހެކި ކޮންމެވެސް ވަރަކަށް ހުށަހަޅާފައިވާ ކަމަށެވެ.