ގަވައިދާ ހިލާފަށް ރާއްޖޭގެ ކަނޑުގެ ސަރަހައްދުގައި ހަރަކާތްތެރިވި މަސް ބޯޓެއް އެމްއެންޑީއެފުން އަތުލައިގެންފިއެވެ.

އެމްއެންޑީއެފުން ބުނިގޮތުގައި މި މަސް ބޯޓު އަތުލައިގަތީ އެމްއެންޑީއެފް ކޯސްޓްގާޑުން ހިންގި އޮޕަރޭޝަނެއްގައެވެ. އެމްއެންޑީއެފުން އެކްސްގައި ބޯޓުގެ ފޮޓޯ ހިއްސާކުރި ނަމަވެސް މިކަމާގުޅިގެން އިތުރު މައުލޫމާތެއް ހާމަކޮށްފައެއްނުވެއެވެ.

އަތުލައިގެންފައިވަނީ ކޮން ގައުމެއްގެ ބޯޓެއް ކަމެއް މި ބޯޓުގައި ތިބީ ކިތައް މީހުން ކަމެއް އަދި ބޯޓު އަތުލައިގަތީ ކޮން ސަރަހައްދަކުން ކަމެއްވެސް އެމްއެންޑީއެފުން އަދި ހާމައެއް ނުކުރެއެވެ.

މީގެ ކުރިންވެސް މިފަދަ ބޯޓުތައް ރާއްޖޭގެ ކަނޑުގެ ސަރަަހައްދުގައި ގަވައިދާ ހިލާފަށް ހަރަކާތްތެރިވަމުން ދަނިކޮށްވަނީ އަތުލައިގަނެފައެވެ. އެގޮތުން މި މަހު 16 ގައި ވެސް ގަވާއިދާ ހިލާފަށް ރާއްޖެއަށް ވަދެ އުޅުނު މަސް ބޯޓެއް ޑްރޯންގެ އެހީގައި ސިފައިން އަތުލައިގަތެވެ.