ދިވެހިރާއްޖެ އާއި އިންޑިއާއާ ދެމެދު ސޮއިކުރެވުނު ކަރަންސީ ސެޓްލްމަންޓް އެއްބަސްވުމަކީ އިންވެސްޓްމަންޓްތައް އިތުރުކުރުމަށް އެޅުނު މުހިންމު ފިޔަވަޅެއް ކަމަށް އިޤްތިޞާދީ ތަރައްޤީއާ ބެހޭ ވުޒާރާއިން ވިދާޅުވެއްޖެއެވެ.

މި މަހުގެ ބުރާސްފަތި ދުވަހު ސޮއިކުރި މި އެއްބަސްވުމުގައި ދިވެހިރާއްޖޭގެ ފަރާތުން ސޮއިކުރެއްވީ މޯލްޑިވްސް މަނިޓަރީ އޮތޯރިޓީގެ (އެމްއެމްއޭ) ގަވަރުނަރު އަޙްމަދު މުނައްވަރެވެ. އިންޑިއާގެ ފަރާތުން ސޮއިކުރެއްވީ ރިޒާވް ބޭންކް އޮފް އިންޑިއާ (އާރުބީއައި) ގެ ގަވަރުނަރު ޝްރީ ޝަކްތިކަންތާ ދާސްއެވެ.

މި އެއްބަސްވުމާ ގުޅިގެން އިޤްތިޞާދީ ތަރައްޤީއާއި ވިޔަފާރިއާ ބެހޭ ވުޒާރާއިން ނެރުނު ބަޔާނުގައި ވިދާޅުވެފައިވަނީ މިއީ ދިވެހިރާއްޖޭގެ އިޤްތިޞާދު ފުޅާކުރުމަށާއި ބައިނަލްއަޤްވާމީ މުހިންމު ބައިވެރިންނާއެކު ގުޅުން ވަރުގަދަ ކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގެންގުޅުއްވާ ދުރުވިސްނޭ ސިޔާސަތުގެ ދަށުން އެޅިގެން ދިޔަ މުހިންމު ފިޔަވަޅެއް ކަމަށެވެ.

އެ ވުޒާރާއިން ފާހަގަ ކުރައްވާފައިވާ ގޮތުގައި ރާއްޖެ އާއި އިންޑިއާއާ ދެމެދު އަހަރަކު 500 މިލިއަން ޑޮލަރުގެ ވިޔަފާރި ކުރެވެއެވެ. މި އެއްބަސްވުމަކީ ވިޔަފާރީގެ ފުރުޞަތުތަކާއި އިންވެސްޓްމަންޓް ފުރުޞަތުތައް އިތުރަށް ފުޅާކުރުމަށް އެޅުނު މުހިންމު ފިޔަވަޅެއް ކަމަށް ވުޒާރާއިން ވިދާޅުވެފައި ވެއެވެ.

މި އެއްބަސްވުމުގެ ދަށުން ދެ ޤައުމުގެ ވިޔަފާރިތަކަށް މުދަލާއި ޚިދުމަތް އެތެރެ ކުރުމާއި ބޭރު ކުރުމުގައި އެ ޤައުމެއްގެ އަމިއްލަ ފައިސާއިން ބިލްކޮށް، އެ ބިލްތަކުގެ ސެޓްލްމަންޓް ހެދުމުގެ ފުރުޞަތު ލިބިގެން ދާނެއެވެ. މީގެ ސަބަބުން ފޮރިން އެކްސްޗޭންޖް މާކެޓުގައި ދިވެހި ރުފިޔާ އާއި އިންޑިއާ ރުޕީސްއިން ވިޔަފާރިކުރުމުގެ ފުރުޞަތު ހުޅުވިގެން ދާނެ ކަމަށް ވުޒާރާއިން ވިދާޅުވެފައި ވެއެވެ.

އިޤްތިޞާދީ ތަރައްޤީއާ ބެހޭ ވަޒީރު މުޙައްމަދު ސަޢީދު ވިދާޅުވެފައިވަނީ މިއީ ތާރީޚީ އެއްބަސްވުމެއްކަމަށާއި، މީގެ ސަބަބުން ދެ ޤައުމުގެ ވިޔަފާރިތަކަށް ބޮޑެތި ފައިދާތަކެއް ލިބޭނެ ކަމަށެވެ.

މި އެއްބަސްވުމަކީ ރައީސުލްޖުމްހޫރިއްޔާ މިދިޔަ އޮކްޓޯބަރު މަހު އި ންޑިއާއަށް ކުރެއްވި ފުރަމާނަ ދަތުރުފުޅުގެ ތެރެއިން ކުރެވުނު މުހިންމު މަޝްވަރާތަކުގެ ނަތީޖާއެކެވެ. އެ ދަތުރުފުޅުގައި އިންޑިއާ އާއި ރާއްޖެއާ ދެމެދު ކުރެވޭ ފައިސާގެ މުއާމަލާތްތަކުގައި ކޮންމެ ޤައުމަކުން އެ ޤައުމެއްގެ އަމިއްލަ ފައިސާ ބޭނުންކުރުމާ ގުޅޭގޮތުން މަޝްވަރާކުރެވި، އިންޑިއާގެ ރުޕޭ ކާޑު ރާއްޖެއަށް ތަޢާރަފްކުރެވުނެވެ.

މީގެ އިތުރުން، އިންޑިއާގެ ޔުނިފައިޑް ޕޭމަންޓްސް އިންޓަރފޭސް (ޔޫ.ޕީ.އައި) ރާއްޖެއަށް ތަޢާރަފުކުރުމަށް ކުރަންޖެހޭ ކަންކަން ކުރިއަށް ގެންދިއުމަށް ވަޒީރުންގެ މަޖިލީހުގެ ލަފާފުޅާއެކު ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވަނީ ނިންމަވާފައެވެ.

މި އެއްބަސްވުމުގެ ސަބަބުން ދިވެހި ވިޔަފާރިވެރިންނަށް އިންޑިއާއިން މުދާ ގެނައުމަށް ފަސޭހަވެ، އިންޑިއާ އާއި ދިވެހިރާއްޖޭގެ ރައްޔިތުންނަށް ދެ ޤައުމުގައި މުދަލާއި ޚިދުމަތް ހޯދުމުގައި ފަސޭހަވާނެ ކަމަށް އިޤްތިޞާދީ ތަރައްޤީއާ ބެހޭ ވުޒާރާއިން ފާހަގަކުރައްވާފައިވެއެވެ. އަދި މި އެއްބަސްވުމުގެ ދަށުން ދެ ޤައުމުގެ އަމިއްލަ ފައިސާ ބޭނުންކުރެވޭ ގޮތްވުމުން ޚަރަދު ކުޑަވެ، ސެޓްލްމަންޓަށް ހިނގާ ވަގުތުވެސް އަވަސްވާނެ ކަމަށް ވުޒާރާއިން ވިދާޅުވެފައިވެއެވެ.