ހުޅުމާލޭގެ މަގުތަކުގައި ހަދާފައިވާ ބައެއް ރައުންޑްއަބައުޓްތަކުގައި ބެހެއްޓުމަށް ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން ކުރިއަށް ގެންދިޔަ މޮނިއުމަންޓްތަކުގެ ޑިޒައިން މުބާރާތުގެ ވަނަތައް ދީފިއެވެ.

މި މުބާރާތުގެ އެންމެ މޮޅު ޑިޒައިން ހުށަހެޅި ޓީމް އާކޮސްއަށް ވަނީ 100،000 ރުފިޔާގެ ފައިސާގެ އިނާމެއް ދޭނެ ކަމަށް އެޗްޑީސީން ބުނެފައެވެ.

މި މުބާރާތަކީ ހުޅުމާލޭގެ މަންޒަރު އިތުރަށް ޒީނަތްތެރިކޮށް، "ދިވެހިންގެ ރާއްޖެ" އަށް ނިސްބަތްވާ ގޮތަށް ދިވެހިންގެ އަގުތަކާއި، ޤައުމިއްޔަތާއި، ސަގާފަތާއި، އާދަކާދަ އަދި ތަރިކަ ދައްކުވައިދޭ ގޮތަށް ފަރުމާކުރެވޭ މޮނިއުމަންޓްތަކެއް ހެދުމަށް ބޭއްވި މުބާރާތެކެވެ. މި މުބާރާތުގައި ބައިވެރިވުމުގެ ފުރުޞަތު ލިބިފައިވަނީ އާޓިސްޓުންނާއި، ޑިޒައިނަރުންނާއި އަދި އާކިޓެކްޓުންނަށެވެ.

މި މުބާރާތާ ގުޅޭ ގޮތުން އެޗްޑީސީން ވަނީ މޮނިއުމަންޓްތައް ފަރުމާކުރުމުގައި ބަލަންޖެހޭ ކަންކަން ހިމެނޭ ގައިޑްލައިނެއް ވެސް ޝާއިޢުކޮށްފައެވެ. މި މޮނިއުމަންޓްތައް ބެހެއްޓުމުގެ މަޤްޞަދަކީ ހުޅުމާލޭގެ މަގުތަކުގައި ދުއްވާ އުޅަނދުފަހަރުގެ ދަތުރުފަތުރު ބެލެހެއްޓުމާއެކު ހުޅުމާލޭގެ މަންޒަރު އިތުރަށް ރީތިކުރުމެވެ.