އަމީނީ މަގުގައި ހުންނަ ފުރްޤާން މިސްކިތުގެ ބައެއް ތަކެއްޗަށް ރޭގެ ފަތިސް ނަމާދުގެ ކުރިން ގެއްލުންތަކެއް ދީފިއެވެ.

މި ޢަމަލު ހިންގާފައިވަނީ އެ މިސްކިތުގައި އާންމުކޮށް ނިދާ އުޅޭ، ބުއްދި ފިލާފައިވާކަމަށް ބެލެވޭ ޒުވާނެއްކަމަށް މަޢުލޫމާތު އެނގޭ ބައެއް ފަރާތްތަކުން ބުނެފައިވެއެވެ.

މިސްކިތުގެ ފަހަތުގައި ހުރި މުސްޙަފްތައް މުޅި ތަނަށް އުކާލައި، އިމާމް ހުންނަ ދިމާލުގެ ކަރަންޓް ބޯޑުތަކާއި އެޔަށް ޖަހާފައިހުރި އެޑެޕްޓަރުތައް ހަލާކުކޮށްލައި، އަދި ވުޟޫކުރާ ބައިގެ ބައެއް އިސްކުރުތައް ބިންދާލައި މިސްކިތުގެ ބައެއް އެއްޗެހި އެތަނަށް އުކާލާފައިވެއެވެ.

މި މައްސަލަ ފުލުހުންނަށް ރިޕޯޓުކުރުމާ ގުޅިގެން، ފަތިސް ނަމާދަށް ފަހު ފުލުހުން ވަނީ މިސްކިތަށް ގޮސް ގެއްލުމުގެ ތަފްސީލް ނަގައިފައެވެ. އަދި ފޮރެންސިކް ފުލުހުން ވެސް ވަނީ ހަރަކާތްތެރިވެފައެވެ.

މި ޒުވާނާ ވަނީ މީގެ ކުރިން ވެސް މިފަދަ އެތައް ޢަމަލެއް މި މިސްކިތުގައި ހިންގާފައި ކަމަށް މަޢުލޫމާތު ލިބެއެވެ. މިސްކިތަށް ގެއްލުން ދިންއިރު އެ މިސްކިތްތަކުގައި 24 ގަޑިއިރު މޮނިޓަރކުރާ ސީސީ ޓީވީ ކެމެރާ ސިސްޓަމެއް ވެސް ހުރެއެވެ.