ހުޅުމާލޭގައި ހުންނަ ޞަލާޙުއްދީން ސްކޫލުގައި ކުރިއަށްދާ ގާލްގައިޑް ކޭމްޕްގެ ދަރިވަރުންނަށް، އެމްއެންޑީއެފް މާލޭ އޭރިއާ ކޮމާންޑް، ހުޅުމާލޭ ފަޔަރ ސްޓޭޝަނުން ފަޔަރ އެވެއަރނެސް ސެޝަނެއް ކުރިއަށް ގެންގޮސްފިއެވެ.

އިއްޔެ ބޭއްވި މި ސެޝަންގައި، އަލިފާން ރޯވާން މެދުވެރިވާ ސަބަބުތަކާއި، އަލިފާން ފެތުރޭ ގޮތްތަކާއި، އަލިފާން ނިއްވާނެ ގޮތުގެ އަސާސީ މަޢުލޫމާތު ދަރިވަރުންނާ ހިއްސާކުރިއެވެ. އަދި އަލިފާންނިވި، ފަޔަރ ބްލޭންކެޓް ބޭނުން ކުރާނެގޮތުގެ މުހިންމު މަޢުލޫމާތުތައް ވެސް ކިޔައިދިނެވެ.

އަލިފާނުގެ ހާދިސާއެއް ހިނގައިފިނަމަ ޢަމަލުކުރަންވީ ގޮތުގެ މަޢުލޫމާތު ވެސް ދިނެވެ. މީގެ އިތުރުން، ފަޔަރ ބްލޭންކެޓް އަދި އަލިފާންނިވި ބޭނުންކޮށްގެން އަލިފާން ނިއްވާނެ ގޮތް ޢަމަލީގޮތުން ދައްކައިދީ، އަލިފާން ނިއްވުމުގެ ހުނަރުތައް ދަރިވަރުންނަށް ދަސްކޮށްދިނެވެ.

އެމްއެންޑީއެފް މާލޭ އޭރިއާ ކޮމާންޑް، ހުޅުމާލޭ ފަޔަރ ސްޓޭޝަންގެ ފަޔަރ ފައިޓަރުން ކިޔަވައިދިން މި ސެޝަންގައި، ގާލްގައިޑް ކޭމްޕްގެ 72 ދަރިވަރުން ބައިވެރިވިއެވެ.