ފާއިތުވި އަހަރު ދިވެހި ރައްޔިތުންގެ ކުރިއެރުމަށް ވެދެއްވި އެހީތެރިކަމަށް ޝުކުރު އަދާކުރުމަށްޓަކައި، ރާއްޖެއަށް އެހީދޭ ޖަމިއްޔާތަކާއި މަލްޓިލޭޓަރަލް ބޭންކްތަކާއެކު، މާލީ ވުޒާރާއިން ޚާއްސަ ބައްދަލުވުމެއް ބާއްވައިފިއެވެ.

މި ބައްދަލުވުން ޝަރަފުވެރިކޮށްދެއްވީ އެޑްވައިޒަރ ފޯ މިނިސްޓަރ އޮފް ފިނޭންސް އަހުމަދު ނަސީރެވެ.

މި ބައްދަލުވުމުގައި ރާއްޖޭގައި އޮފީސް ޤާއިމުކޮށްފައިވާ އެޖެންސީތަކުން ބައިވެރިވެފައިވެއެވެ. އޭގެ ތެރޭގައި ޖަޕާން އިންޓަރނޭޝަނަލް ކޯޕަރޭޝަން އޭޖެންސީ (ޖައިކާ)، ޔުނައިޓެޑް ނޭޝަންސް ޑިވެލޮޕްމަންޓް ޕްރޮގްރާމް (ޔޫއެންޑީޕީ)، ވޯލްޑް ހެލްތު އޯގަނައިޒޭޝަން (ޑަބްލިއުއެޗްއޯ)، ޔުނައިޓެޑް ނޭޝަންސް ޗިލްޑްރަންސް ފަންޑް (ޔުނިސެފް)، ވޯލްޑް ބޭންކް ގްރޫޕް، އަދި އޭޝިއަން ޑިވެލޮޕްމަންޓް ބޭންކް (އޭޑީބީ) ހިމެނެއެވެ.

އެޑްވައިޒަރ، އަޙްމަދު ނަޞީރު ވާހަކަފުޅުގައި ވަނީ، ރާއްޖޭގެ ތަރައްޤީގެ މަޝްރޫޢުތަކަށް ފައިސާ ހަމަޖެއްސުމަށް ބޭރުގެ އެހީދޭ ޖަމާއަތްތަކާއި މަލްޓިލޭޓަރަލް ބޭންކުތަކުން ވެދެއްވާ އެހީތެރިކަމަށް ޝުކުރު އަދާކުރައްވައިފައެވެ. އަދި މި ބައްދަލުވުމުގައި ބައިވެރިނުވެވުނު އެހެނިހެން ޑޯނަރ އެޖެންސީތަކަށް ވެސް ސަރުކާރާއި ދިވެހި ރައްޔިތުންގެ ފަރާތުން ޚާއްސަ ޝުކުރެއް އަދާކުރެއްވިއެވެ.

މި ބައްދަލުވުމުގައި ބައިވެރިވި ފަރާތްތަކަށް ސަރުކާރާއި ދިވެހި ރައްޔިތުންގެ ފަރާތުން ޝުކުރު އަދާކުރުމުގެ ގޮތުން ހަނދާނީ ފިލައެއް އަރުވާފައިވެއެވެ.