އިމިގްރޭޝަން މޯލްޑިވްސް އިން "ހޯމް ޓީމް އާއިލީ ހަވީރު" ގެ ނަމުގައި ބޭއްވި ހަރަކާތުގައި އެ އިދާރާގެ އިސްވެރިންނާއި މުވައްޒަފުން ޢާއިލާއާ އެކު ބައިވެރިވެއްޖެއެވެ.

މި ހަރަކާތުގައި އިމިގްރޭޝަންގެ ކޮންޓްރޯލަރ ޖެނެރަލް ޝަމާން ވަހީދު އާއި ޑެޕިއުޓީ ކޮންޓްރޯލަރ އަހުމަދު އަޝްފާން ވެސް އެ ބޭފުޅުންގެ ޢާއިލާއާއެކު ބައިވެރިވެވަޑައިގެންނެވިއެވެ. މި ހަވީރަކީ އުފާވެރި މާހައުލެއްގައި ކުޑަކުދިންނާއެކު ވަގުތު ހޭދަކޮށް، ހަނދާންތައް އާކުރުމުގެ ފުރުޞަތު ލިބުނު ހަރަކާތެއް ކަމަށް އިމިގްރޭޝަނުން މަޢުލޫމާތު ދެއެވެ.

ހަރަކާތުގައި އެކި ބާވަތުގެ ކުޅިވަރުތަކާއި ހަރަކާތްތައް ހިމެނުނު ކަމަށާއި، ޚާއްޞަކޮށް އިމިގްރޭޝަން ދާއިރާއާ ގުޅުންހުރި ކުޅިވަރުތަކެއް ކުޅެވުނު ކަމަށް އިމިގްރޭޝަނުން ބުނެއެވެ. މީގެ އިތުރުން ކުޑަކުދިންނާއެކު ވަގުތު ހޭދަކޮށް، އެކުވެރިކަން ބަދަހިކުރުމުގެ ފުރުޞަތު ލިބުނު ކަމަށް ވެސް އެ އިދާރާއިން ފާހަގަކުރިއެވެ.

"ހޯމް ޓީމް އާއިލީ ހަވީރު" އަކީ އިމިގްރޭޝަންގެ މުވައްޒަފުންގެ މެދުގައި އެކުވެރިކަން އިތުރުކޮށް، މަސައްކަތުގެ މާހައުލުން ބޭރުގައި އެއްބައިވަންތަކަން އާލާކުރުމަށް ބޭއްވި ހަރަކާތެއް ކަމަށް އެ އިދާރާއިން ބުންޏެވެ.