ENGLISH

31 އޯގަސްޓު 2025

Advertisement

ސްރީ ލަންކާ ރަށްވެހިންނަށް ރާއްޖޭން 90 ދުވަހުގެ އޮން އެރައިވަލް ވިސާ ދޭން ފަށައިފި

31 ޖުލައި 2025

|

ޢަލީ ޝަހީމް

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އަދި ލަންކާގެ ރައީސް ޑިސެނަޔަކަ. ދެގައުމުގެ ދެމެދުގައި ގިނަ މަޝްވަރާތަކެއް ކުރިއަށްގެންދެވި. ފޮޓޯ: ރައީސް އޮފީސް

ސްރީ ލަންކާގެ ރައީސް އަނޫރާ ކުމާރަ ޑިސެނަޔަކަ ރާއްޖެއަށް ކުރެއްވި ފުރަމާނަ ދަތުރުފުޅުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއާ ކުރެއްވި މަޝްވަރާތަކަށްފަހު، ސްރީ ލަންކާގެ ރައްޔިތުންނަށް ރާއްޖޭން ދޭން ހަމަޖެއްސި 90 ދުވަހުގެ އޮން އެރައިވަލް ވިސާ އިއްޔެއިން ފެށިގެން ދޭން ފަށައިފިއެވެ. 

މޯލްޑިވްސް އިމިގްރޭޝަނުން އިއްޔެ "އެކްސް" ގައި ކުރި ޕޯސްޓުގައި ބުނީ، ޖުލައި 30 ވަނަ ދުވަހުން ފެށިގެން ލަންކާ ރައްޔިތުންނަށް ރާއްޖޭން 90 ދުވަހުގެ އޮން އެރައިވަލް ހިލޭ ވިސާ އިއްޔެއިން ފެށިގެން ލިބިގެންދާނެ ކަމަށެވެ. 

ސްރީ ލަންކާއިން އަންނަނީ ދިވެހީންނަށް އޮން އެރައިވަލް 90 ދުވަހުގެ ވިސާ ދެމުންނެވެ. ސްރީ ލަންކާއިން އެގޮތަށް އަމަލުކުރަން ފެށީ މިއަހަރުގެ ޖަނަވަރީ މަހުން ފެށިގެންނެވެ. 

ސްރީ ލަންކާއިން ވަނީ އެގައުމުގައި ވަޒީފާ އަދާކުރާ ނުވަތަ މަތީ ތައުލީމު ޙާޞިލްކުރާ ދިވެހިންގެ އަނބިން ނުވަތަ ފިރިންނަށް ވެސް އެއް އަހަރުގެ ވިސާ ލިބޭ ގޮތް ހަމަޖައްސައިފައެވެ. އަދި، އޮގަސްޓް މަހުން ފެށިގެން ދިވެހިންނަށް އެއް އަހަރުގެ ވިސާ ދޭން ލަންކާއިން ފަށާނެކަމަށް އެގައުމުން ވަނީ ބުނެފައެވެ. 

ސްރީލަންކާގެ ރައީސް ޑިސެނަޔަކަ، ރާއްޖެ ވަޑައިގަތުމުން ދިވެހި ސަރުކާރުން އެ މަނިކުފާނަށް ވަނީ ރަސްމީގޮތުން މަރްޙަބާ ދަންނަވާފައެވެ. އަދި މި ދަތުރުފުޅުގައި ރައީސުލްޖުމްހޫރިއްޔާ، ޑޮކްޓަރ މުޙައްމަދު މުޢިއްޒު އާއެކު ރަސްމީ މަޝްވަރާތައް ކުރައްވައި، ދެ ޤައުމުގެ މެދުގައި މުހިންމު ދާއިރާތަކުން އެއްބާރުލުން ދިނުމުގެ ފަހުމުނާމާއަކާއި މުއާހަދާއެއްގައި ސޮއިކުރެއްވުމުގެ ރަސްމިއްޔާތުގައި ރައީސް ޑިސެނަޔަކަ ބައިވެރިވެވަޑައިގެންފައިވެއެވެ.

ދެ ޤައުމުގެ ދެމެދުގައި އޮތް ގުޅުން އިތުރަށް ބަދަހިކުރެއްވުމުގެ އަޒުމް އައު ކުރައްވަމުން ދެ ގައުމުގެ ވެރިން ވަނީ ގުޅިފައިވާ ބަޔާނެއް ދެއްވާފައެވެ. އަދި ސްރީލަންކާގެ ރައީސްގެ ޝަރަފުގައި، ރައީސުލްޖުމްހޫރިއްޔާ ފުރަމާނަ ޖާފަތެއްވެސް ވަނީ ދެއްވާފައެވެ. މި ދަތުރުފުޅުގެ ތެރެއިން ކެބިނެޓުގެ ބައެއް ވަޒީރުންނާއި ދައުލަތުގެ އިސްވެރިން ސްރީލަންކާގެ ރައީސްގެ އަރިހަށް އިޙްތިރާމުގެ ޒިޔާރަތް ކުރައްވާފައިވެއެވެ.

ކިޔުންތެރިންގެ ހިޔާލު