ރާއްޖޭގައި ސައިބަރ ކްރައިމް އާއި ފޮރެންސިކް ދާއިރާތަކުން ޑިގްރީ ފެންވަރަށް ކިޔަވައިދޭން ފަށާނެ ކަމަށް ހަޔާރ އެޑިއުކޭޝަން، ލޭބަރ އެންޑް ސްކިލްސް ޑިވެލޮޕްމަންޓް މިނިސްޓަރު ޑރ. މަރިޔަމް މާރިޔާ ވިދާޅުވެއްޖެ އެވެ.

މިނިސްޓަރ މިހެން ވިދާޅުވެފައި ވަނީ ބޭއްވި ނެޝަނަލް ކޮލެޖް އޮޕް ޕޮލިސިން އެންޑް ލޯ އެންފޯސްމަންޓުގެ ކޯސްތަކުގެ ދަސްވެނިވުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.

މިނިސްޓަރ މާރިޔާ ވިދާޅުވީ ފުލުހުންނަކީ ހަމައެކަނި ގާނޫނު ތަންފީޒު ކުރުމަށް ތިބި ބައެއް ނޫން ކަމަށާއި ގާނޫނަށް ތަބާވާ އަހުލާގު ރަނގަޅު ގާބިލު އަދި ނަމޫނާ ބަޔަކަށް ފުލުހުން ވާން ޖެހޭ ކަމަށެވެ. އަދި އެކަން ކަށަވަރު ކުރުމަށް މަތީ ތައުލީމާއި ތަމްރީނު މުހިންމު ކަމަށް ވެސް މިނިސްޓަރގެ ވާހަކައިގައި ފާހަގަކުރެއްވިއެވެ.

މީގެ އިތުރުން، ރާއްޖޭގައި މި ވަގުތު ތަންފީޒުކުރަމުންދާ މަތީ ތައުލީމުގެ މަންހަޖުގެ ތެރެއަށް ސައިބާރ ކުށްތަކާއި ޑިޖިޓަލް އަދި ފޮރެންސިކްގެ ދާއިރާ ފަދަ ދާއިރާތައް ހިމެނުމުގެ މަސައްކަތް މިނިސްޓްރީން ކުރަމުންދާ ކަމަށް ވެސް މިނިސްޓަރ ވިދާޅުވި އެވެ.

ޒަމާނީ ކުށްތަކާއި ގޮންޖެހުންތަކަށް ހައްލު ހޯދުމަށް ބޭނުންވާ އިލްމާއި ހުނަރު އޮފިސަރުންނަށް ލިބޭނެ ގޮތް ހަމަޖައްސާ، ތަމްރީނު ޕްރޮގްރާމްތައް ކުރިއަށްގެންދާނެ ކަމަށް ވެސް މިނިސްޓަރ ފާހަގަކުރެއްވި އެވެ.