ރާއްޖެއިން ދީނީ އިލްމު ކިޔެވުމުން، ދީނީ ނަސޭހަތް ދެވޭގޮތަށް ދަރަޖަ ކުރުމުގެ ވިސްނުން ގެންގުޅުއްވާ ކަމަށް އިސްލާމީ ކަންތައްތަކާ ބެހޭ ވަޒީރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.

ފަތުވާ މަހާސިންތާ މިއަދު ފައްޓަވައިދެއްވުމުގެ ރަސްމިއްޔާތުގައި ވާހަކަދައްކަވަމުން ޑރ. ޝަހީމް ވިދާޅުވީ ރާއްޖޭގެ ފަތުވާގެ ނިޒާމު ހަރުދަނާކުރުމަކީ ސަރުކާރުގެ ސިޔާސަތެއް ކަމަށާއި ދީނީ އެއްބައިވަންތަކަން ގާއިމުކުރެއްވުމަށް ރައީސް ޑޮކްޓަރ މުހައްމަދު މުއިއްޒު ވަރަށް އިސްކަން ދެއްވާ ކަމަށާއި ގިނަ ދުވަސްތަކަކަށް ފަތުވާ ކައުންސިލްގެ މެންބަރުން ހަމަނުވެ އޮތް އޮތުން، ރައީސް ވަނި ނިމުމަކަށް ގެންނަވައި، ގާނޫނުގައި ބުނާ ފުރިހަމަ އަދަދަށް މެންބަރުން އައްޔަންކުރެވިފައި ކަމަށް ވެސް ވަޒީރު ވިދާޅުވިއެވެ.

މީގެ އިތުރުން ވަޒީރު ޝަހީމް ވިދާޅުވީ ޝަރީއަތުގެ ހުކުމްތައް ބަޔާންކޮށް ފަތުވާ ދިނުމަކީ ވަރަށް މަތީ ކަމެއް ކަމަށެވެ. ނަމަވެސް ރާއްޖޭގެ ޔުނިވަރސިޓީފަދަ ތަންތަނުން ދީނީ އިލްމު އުނގެނޭ މީހުންނަށް އެ ފުރުސަތު ނެތްކަމަށް ވަޒީރު ވަނީ ފާހަގަކުރައްވައިފައެވެ. އަދި މިހާތަނަށް މިކަން ކުރުމުގެ ފުރުސަތު އޮންނަނީ ރާއްޖެއިްނ ބޭރުގެ ޔުނިވަރސިޓީތަކުން ކިޔަވާވިދާޅުވެގެން އަންނަ އިލްމުވެރިންނަށް ކަަމަށް ވަޒީރު ވިދާޅުވިއެވެ.

މީގެއިތުރުން ވަޒީރު ވިދާޅުވީ ސަރުކާރުން ވަރަށް އަވަހަށް މިކަންކުރަން ބޭނުންވާ ކަމަށާއި ރާއްޖޭގައި ދީނީ އެއްބައިވަންތަކަން ގާއިމްކުރުމަށްޓަކައި މިކަމަކީ ކުރަންޖެހިފައިވާ ކަމެއް ކަމަށް ކަމަށެވެ.

ރާއްޖޭގައި ވައުޒާއި އިރުޝާދާއި ފަތުވާ ދިނުން ދަރަޖަ ކުރުމާމެދު އިލްމުވެރިންގެ މަޝްވަރާ ބޭނުންވާ ކަމަށާއި އިސްލާމީ ކަންކަން ހިންގުމުގައި އިލްމުވެރިން ދެއްވާ ލަފާފުޅުތަކަށް އަބަދުވެސް އިޙުތިރާކުރާނެކަމުގެ ޔަގީންކަން ވަޒީރު ވަނީ ދެއްވައިފައެވެ.