ރައްޔިތުންގެ މަޖިލީހުގެ މަސައްކަތްތަކާ ގުޅޭގޮތުން މަަޖިލީހުގެ އިދާރާއިން ޢާއްމުކުރަން ގެންދާ މަޢުލޫމާތުތައް ޒިންމާދާރުކަމާއެކީ ޙިއްސާކުރުމަށާއި، އަދި މަޢުލޫމާތު ޢާއްމުކުރުމުގެ ކުރިން އެ މަޢުލޫމާތަކީ ތެދު މަޢުލޫމާތެއްކަން ކަށަވަރުކުރުމަށް އެންމެހާ ފަރާތްތަކަށް އެ އިދާރާއިން އިލްތިމާސްކޮށްފިއެވެ. 

މަޖިލީހުން ރޭ ނެރުނު ބަޔާނުގައި އާއްމުންނަށް އެގޮތަށް އިލްތިމާސްކުރީ މަޖިލީހުގެ މެމްބަރުންގެ މަސައްކަތްތަކާއި ގުޅޭގޮތުން މީސްމީޑިއާގައި ޝާޢިއުކޮށްފައިވާ މަޢުލޫމާތަކާއި ގުޅިގެންނެވެ. 

މަޖިލީހުން އާއްމުކުރި ބަޔާނުގައި ބުނީ ޤާނޫނުއަސާސީންނާއި ޤާނުނުތަކުން މަޖިލީހަށް މަތިކޮށްފައިވާ ޒިންމާތަކާއި މަސްއޫލިއްޔަތުތައް އަދާކުރުމުގައި މަޖިލީހުގެ މަސައްކަތްތަކުގެ މައުލޫމާތު ވީހާވެސް ހާމަކަންބޮޑު ގޮތެއްގައި ރައްޔިތުންނަށް ފޯރުކޮށްދިނުމަށްޓަކައި، ޤާނޫނުއަސާސީގެ 85 ވަނަ މާއްދާގެ ދަށުން، އާއްމު އުސޫލެއްގެ ގޮތުން ރައްޔިތުންގެ މަޖިލީހުގެ ޖަލްސާތަކާއި މަޖިލީހުގެ ކޮމިޓީތަކުގެ ބައްދަލުވުންތައް ކުރިއަށްގެންދަނީ އާއްމުންނަށް ހުޅުވާލައިގެން ކަމަށެވެ. އަދި، ވެބްސައިޓުގައި މަޢުލޫމާތު ހާމަކުރަމުންގެންދަނީ އެ އިދާރާގެ މަސައްކަތްތައް ވީހާވެސް ހާމަކަންބޮޑު ގޮތެއްގައި އެ މައުލޫމާތު ފޯރުކޮށްދިނުމުގެ މަޤްޞަދުގައި ކަމަށް އެ އިދާރާގެ ބަޔާނުގައި ބުނެފައިވެއެވެ. 

ބަޔާނުގައި ބުނެފައިވަނީ މަޖިލީހުގެ ގިނަ މަސައްކަތްތަކެއް ކޮމިޓީތަކުގައި ކުރިއަށްގެންދާ ކަމަށެވެ. އަދި، މަޖިލީހުގެ ޖަލްސާތަކާއި ކޮމިޓީތަކުގައި މެންބަރުން ކުރައްވާ މަސައްކަތްތައް ނިމިގެންދާނީ މަޖިލީހުގެ ހުރިހާ މެންބަރުންގެ ބައިވެރިވުމާއެކުގައި ކަމަށް ރައްޔިތުންގެ މަޖިލީހުގެ ބަޔާނުގައި ފާހަގަކޮށްފައިވެއެވެ. 

މީސްމީޑިއާގައި މެންބަރުންގެ މަސައްކަތްތަކާއި ގުޅޭގޮތުން ހާމަކޮށްފައިވާ މަޢުލޫމާތާ ގުޅޭގޮތުން މަޖިލީހުގެ ބަޔާނުގައި އިލްތިމާސްކުރީ، އެ އިދާރާއިން އާއްމުކުރާ މަޢުލޫމާތު ނަހަމަގޮތުގައި ބޭނުންނުކޮށް، މަޢުލޫމާތު ޢާއްމުކުރުމުގެ ކުރިން އެ މަޢުލޫމާތަކީ ތެދު މަޢުލޫމާތެއްކަން ކަށަވަރުކުރުމަށެވެ.