ސަރުކާރު ހިންގާ މައި ޕާޓީ، ޕީޕަލްސް ނޭޝަނަލް ކޮންގްރެސް (ޕީއެންސީ) ގެ އެތެރޭގެ އިންތިޚާބު މާދަމާ ބޭއްވުމަށް ތައްޔާރުވެއްޖެއެވެ.

މި އިންތިޚާބަކީ މިހާތަނަށް ރާއްޖޭގެ ސިޔާސީ ޕާޓީއަކުން ބާއްވާ އެންމެ ބޮޑު އިންތިޚާބު ކަމަށް ޕީއެންސީން ބުންޏެވެ.

މި އިންތިޚާބު ރާއްޖޭގެ ހުރިހާ އަތޮޅެއްގައި ވެސް ކުރިއަށްދާނެ ކަމަށް ޕީއެންސީން މަޢުލޫމާތު ދީފައިވެއެވެ. އިންތިޚާބުގެ ވޯޓުލުން ކުރިއަށްދާނީ ހެނދުނު 10:00 އިން މެންދުރުފަހު 14:00 އާ އަށެވެ. ރަށްރަށުގައި ވޯޓު ފޮށި ބަހައްޓާނީ އެ ރަށެއްގެ ސްކޫލްގައެވެ. މާލޭގެ ދާއިރާތަކާއި އަތޮޅުތަކުގެ ފޮށިތައް ބަހައްޓާނީ ދަރުބާރުގޭގައެވެ. ހުޅުމާލޭގެ ދާއިރާތަކުގެ ފޮށި ރެހެންދި ސްކޫލުގައި އަދި ވިލިމާލެ ދާއިރާގެ ފޮށި މުޙިއްޔުއްދީން ސްކޫލުގައި ބެހެއްޓުމަށް ވަނީ ހަމަޖެހިފައެވެ.

މި އިންތިޚާބުގައި ޖުމްލަ 2095 މަޤާމަކަށް މެންބަރުން އިންތިޚާބުކުރާނެ ކަމަށް ޕީއެންސީން ބުންޏެވެ.

އިންތިޚާބުކުރާ މަޤާމުތަކުގެ ތެރޭގައި ދާއިރާތަކުގެ ރައީސުންނާއި ނައިބު ރައީސުން، ރަށްރަށުގެ ޒުވާނުންގެ ހަރަކާތުގެ ރައީސުން، ރަށްރަށުގެ އަންހެނުންގެ ހަރަކާތުގެ ރައީސުން އަދި ސްޓިއަރިން ކޮމިޓީތަކުގެ މެންބަރުން ހިމެނެއެވެ. ނަމަވެސް، ގިނަ ރަށްތަކުގައި އިންތިޚާބަކާ ނުލައި ބައެއް މަޤާމުތަކަށް ބޭފުޅުން ވަނީ ހޮވިފައެވެ.

ޕީއެންސީގެ އެތެރޭގެ އިންތިޚާބު އިޢުލާންކޮށް، އިންތިޚާބުކުރާ މަޤާމުތަކަށް ކުރިމަތިލާން ހުޅުވާލީ މިދިޔަ ސެޕްޓެންބަރުމަހުގެ 11 ވަނަ ދުވަހުއެވެ. އިންތިޚާބަށް ކުރިމަތިލާން ހުޅުވާލި މުއްދަތު މިދިޔަ މަހުގެ 24 ވަނަ ދުވަހު ވަނީ ހަމަވެފައެވެ.