ސަރުކާރުން ފޯރުކޮށްދޭ ހިލޭ ޑިގްރީ ސްކީމްގެ ދަށުން މިއަހަރުގެ މިހާތަނަށް 85 މިލިއަން ރުފިޔާ ދޫކޮށްފައިވާކަމަށް މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާ ބެހޭ ވުޒާރާއިން ބުނެފިއެވެ. 

އެ ވުޒާރާއިން މިއަދު ވަނީ ހިލޭ ޑިގްރީ ސްކީމްގެ، 2025 ޖުލައި 10 ވަނަ ދުވަހުގެ ނިޔަލަށް އަދާހަމަ މީސްމީޑިއާގައި އާއްމުކޮށްފައެވެ. އެގޮތުން އަހަރުގެ މިހާތަނަށް 85،478،150.89 (އައްޑިހަ ފަސްމިލިއަން، ހަތަރު ލައްކަ ހަތްދިހަ އަށްހާސް، ސަތޭކަ ފަންސާސް ރުފިޔާ އަށްޑިހަ ނުވަލާރި) ދަރިވަރުންނަށް ވަނީ ދޫކޮށްފައެވެ. 

ހިލޭ ޑިގްރީ ސްކީމްގެ ދަށުން މިދިޔަ އަހަރާއި މިއަހަރުގެ މިހާތަނަށް 3888 ދަރިވަރުން ވަނީ ރަޖިސްޓްރީވެފައެވެ. އަދި، އުނގެނެމުންދިޔަ ދަރިވަރުންގެ ތެރެއިން 5412 ދަރިވަރުން މިދިޔަ އަހަރާއި މިއަހަރުގެ މިހާތަނަށް ވަނީ ގްރޭޖުއޭޓްވެފައެވެ. 

އެ ވުޒާރާއިން އާއްމުކޮށްފައިވާ ތަފާސްހިސާބުގައި ބުނެފައިވަނީ މިހާރު 8086 ދަރިވަރުން ހިލޭ ޑިގްރީ ސްކީމްގެ ދަށުން ކިޔަވަމުންދާކަމަށެވެ. އޭގެތެރޭގައި ހިމެނެނީ 5047 އަންހެން ދަރިވަރުންނާއި 3039 ފިރިހެން ދަރިވަރުންނެވެ.