ސޯޝަލް މީޑިއާ ޕްލެޓްފޯމް އިންސްޓަގްރާމުގެ އެލްގޮރިދަމުން ހުށަހަޅާ ހުރިހާ ކޮންޓެންޓެއް ފުހެލުމަށް އިޚްތިޔާރު ދޭ އާ ފީޗާއެއް ޓެސްޓުކުރަމުންދާ ކަމަށް ބުނެފިއެވެ.

"ރީސެޓް" ޓޫލްގެ ނަމުގައި ތަޢާރަފުކުރާ މި ފީޗަރ އަކީ ބޭނުންކުރާ މީހާގެ ފީޑު އެއްކޮށް ސާފުކޮށްލެވޭ ގޮތަށް ހަދާފައިވާ އެއްޗެކެވެ.

އިންސްޓަގްރާމުން ބުނި ގޮތުގައި މި ފީޗަރ ވަރަށް އަވަހަށް ދުނިޔޭގެ ހުރިހާ ކަންކޮޅުތަކެއްގައި ވެސް ބޭނުންކުރަން ފަށާނެއެވެ. ނަމަވެސް، މި ފީޗަރ ބޭނުންކުރުމަށް ފަހު ވަގުތު ފާއިތުވަމުންދާއިރު، އަނެއްކާވެސް ބޭނުންކުރާ މީހާގެ ޝައުޤުތަކާ ގުޅޭ ކޮންޓެންޓް ހުށަހަޅަން ފަށާނެ ކަމަށް އެ ކުންފުނިން ބުނެފައިވެއެވެ.

މި އާ ފީޗަރ ތަޢާރަފުކުރަނީ އިންސްޓަގްރާމް ބޭނުންކުރާ މީހުންނަށް ފަސޭހަ ކުރުމުގެ ގޮގެން ގެންނަ އިތުރު ބަދަލުތަކެއްގެ ތެރެއިންނެވެ. މީގެ ކުރިން އޮކްޓޯބަރު މަހު ވަނީ ސަލާމަތީ ފީޗަރތަކެއް ތަޢާރަފުކޮށް އަދި ސެޕްޓެމްބަރ މަހު ޒުވާނުންނަށް ޚާއްޞަ އެކައުންޓްތަކެއް ތަޢާރަފުކޮށްފަ އެވެ.

އިންސްޓަގްރާމުގެ މައި ކުންފުނި މެޓާ އިން ބުނީ މި އާ ފީޗާ ހުރިހާ އުމުރުފުރައެއްގެ މީހުންނަށް ވެސް ބޭނުންކުރެވޭނެ ކަމަށެެވެ. 

މި އާ ފީޗަރ ތަޢާރަފުކުރަނީ  ޔޫކޭގެ އޮންލައިން ސޭފްޓީ އެކްޓް ޑިސެމްބަރު މަހު ތަންފީޒުކުރަން ފެށުމުގެ ކުރިންނެވެ. މި ޤާނޫނުގެ ދަށުން، އިންސްޓަގްރާމް ފަދަ ބޮޑެތި ޓެކްނޮލޮޖީ ކުންފުނިތަކަށް ތިން މަސްދުވަހުގެ މުއްދަތެއް ދެވޭނެއެވެ. މި މުއްދަތުގެ ތެރޭގައި އޮންލައިންކޮށް ޤާނޫނާ ޚިލާފު ކޮންޓެންޓް ފެތުރުމުގެ ނުރައްކާތައް ދެނެގަނެ، އެފަދަ ކޮންޓެންޓް ހުއްޓުވުމަށް ފިޔަވަޅު އަޅަންޖެހޭނެއެވެ.

އޮންލައިން ސަލާމަތާއި ރައްކާތެރިކަމާ ގުޅޭ ގޮތުން ބައިނަލްއަޤްވާމީ ފެންވަރުގައި ބޮޑު ބަހުސެއް ކުރިއަށްދާއިރު، އޮސްޓްރޭލިއާއިން ވަނީ 16 އަހަރުން ދަށުގެ ކުދިންނަށް ސޯޝަލް މީޑިއާ ބޭނުންކުރުން މަނާކުރުމަށް ނިންމައިފައެވެ.