އެމެރިކާގެ އަލަށް އިންތިޚާބުވި ރައީސް ޑޮނަލްޑް ޓްރަމްޕް، ސްޕޭސްއެކްސްގެ ސީއީއޯ އީލޮން މަސްކްއާ އެކު އެ ކުންފުނިން އުފައްދާފައިވާ ސްޓާޝިޕް ރޮކެޓް ދަތުރު ފެށުމުގެ ރަސްމިއްޔާތުގައި ބައިވެރިވެވަޑައިގެންފިއެވެ.

މި ރަސްމިއްޔާތު ބޭއްވީ އަންގާރަ ދުވަހު ޓެކްސާސްގެ ބޯކާ ޗިކާގައި ހުންނަ ސްޕޭސްއެކްސްގެ ސްޓާބޭސް ސައިޓުގައެވެ.

ރަސްމިއްޔާތުގެ ކުރިން ޓްރަމްޕް ވަނީ އޭނާގެ ސޯޝަލް މީޑިއާ ޕްލެޓްފޯމް "ޓްރޫތު ސޯޝަލް" ގައި ޕޯސްޓެއް ކުރައްވައިފައެވެ. މި ޕޯސްޓުގައި ވަނީ ރޮކްޓް ދަތުރު ބައްލަވާލަން އޭނާ ޓެކްސަސްއަށް ވަޑައިގަންނަވާކަން ހާމަކުރައްވާފައެވެ.

މި ރަސްމިއްޔާތުގައި ޓްރަމްޕް ބައިވެރިވެވަޑައިގަތުމުން ދައްކުވައިދެނީ އޭނާ އާއި މަސްކްއާ ދެމެދު އޮތް ގާތް ގުޅުމެވެ. 

ޓްރަމްޕް ވަނީ މަސްކް އަށް "ޑިޕާޓްމަންޓް އޮފް ގަވަރމަންޓް އެފިޝަންސީ" ކޮމިޝަނުގެ ވެރިޔާގެ މަޤާމު ދެއްވައިފައެވެ. މި ކޮމިޝަނުގެ އަނެއް ވެރިއަކީ ކުރީގެ ރިޕަބްލިކަން ރިޔާސީ ކެންޑިޑޭޓް ވިވެކް ރާމަސްވާމީއެވެ.

މި ދަތުރަކީ ސްޓާޝިޕް ރޮކެޓުގެ ހަ ވަނަ ދަތުރެވެ. މިއީ މިހާތަނަށް އުފެއްދި އެންމެ ބޮޑު ރޮކެޓެވެ. މި ދަތުރުގައި މީހަކު ނުހިމެނެއެވެ. މި ދަތުރުގެ މަޤްޞަދަކީ ރޮކެޓުގެ "ސުޕަރ ހެވީ" ބޫސްޓަރު އަނބުރާ ގެނައުމެވެ. ނަމަވެސް މި ބޫސްޓަރު ވެއްޓުނީ މެކްސިކޯ ކަނޑަށެވެ.

ސްޓާޝިޕް ފަރުމާކޮށްފައި ވަނީ މުދަލާއި މީހުން ބިމުން ބޭރަށް ގެންދިއުމަށް ބޭނުންކުރެވޭ ގޮތަށެވެ.