ރާއްޖޭގައި ފަށާފައިވާ ސީ-ޓު-އެއަރ ކާގޯގެ ޚިދުމަތާ މެލޭޝިއާގެ އެއަރލައިނެއް ކަމުގައިވާ ވޯލްޑް ކާގޯ އިން ބައިވެރިވެއްޖެއެވެ.

ސީ-ޓު-އެއަރ ކާގޯގެ ޚިދުމަތަކީ، ކަނޑުމަގުން އަންނަ މުދާ، ޓްރާންސިޓުކޮށް ވައިގެ މަގުން ދުނިޔޭގެ އެހެން ގައުމުތަކަށް ފޮނުވުމެވެ. މިއީ ދުނިޔޭގެ ވަރަށް ގިނަ ގައުމުތަކުން ކުރަމުން އަންނަ، އަދި އެ ގައުމުތަކުގެ އިޤްތިޞާދަށް ބޮޑެތި މަންފާތަކެއް ލިބެމުން އަންނަ މަސައްކަތެކެވެ.

ވޯލްޑް ކާގޯ އެއަރލައިނުން މި ޚިދުމަތް ފެށުމުގެ ގޮތުން ވަނީ ބަންގްލަދޭޝުން ރާއްޖެއަށް ކަނޑު މަގުން ގެނައި އަންނައުނުގެ ބާވަތްތައް ޔޫރަޕްގެ އެކި ޤައުމުތަކަށް ގެންގޮސްފައެވެ.

މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް)، މޯލްޑިވްސް ޕޯޓްސް ލިމިޓެޑް (އެމްޕީއެލް) އަދި މޯލްޑިވްސް ކަސްޓަމްސް ސަރވިސް ގުޅިގެން ފޯރުކޮށްދޭ މި ޚިދުމަތް ތަޢާރަފްކުރީ މި އަހަރުގެ މާރޗު މަހު އެވެ. އަދި ސީ-ޓު-އެއަރ ކާގޯގެ ޚިދުމަތުގެ ފުރަތަމަ ޝިޕްމަންޓް ރާއްޖޭން ފޮނުވީ މި އަހަރުގެ މެއި މަހު އެވެ. މިހާތަނަށް 12 އެއަރލައިން ވަނީ މި ޚިދުމަތާ ގުޅިފައެވެ.

މި ޚިދުމަތަކީ ރައީސް ޑރ. މުޙައްމަދު މުޢިއްޒުގެ ވެރިކަމުގައި ރާއްޖޭގެ އިގުތިޞާދު ހަރުދަނާ ކުރެއްވުމަށް ވެރިކަމުގެ ފުރަތަމަ އަހަރު ފެއްޓެވި މަސައްކަތްޕުޅުތަކުގެ ތެރޭ ހިމެނޭ ކަމެކެވެ. އެމްޕީއެލްއިން ބުނާ ގޮތުގައި މި ޚިދުމަތް މިހާރު ބާރު ސްޕީޑްގައި ފުޅާވަމުން އަންނަ އަދި މިހާތަނަށް މި މަސައްކަތުން ރާއްޖޭގެ އިޤްތިސާދަށް ތިން މިލިޔަނަށްވުރެ ގިނަ ޑޮލަރު ވަދެފައިވެއެވެ.