މެންޗެސްޓާރ ޔުނައިޓެޑުގެ އާ ކޯޗު ރުބެން އަމޯރިމް، އޭނާގެ ފުރަތަމަ ޕްރެކްޓިސްގައި ޖޫނިއާރ ޓީމަށް ކުޅޭ 16 އަހަރުގެ ޑިފެންޑަރެއް ބައިވެރިކޮށްފިއެވެ.

އިނގެރޭސި ވިލާތުގައި މަސައްކަތްކުރުމަށް ވިސާ ހަމަޖެހުމާ އެކު އަމޯރިމްގެ އިރުޝާދުތަކާއެކު އެ ޓީމުގެ ޕްރެކްޓިސް އިއްޔެ ވަނީ ފަށައިފައެވެ. އެހެން ނަމަވެސް އޭނާގެ ފުރަތަމަ ޓްރެއިނިން ސެޝަނުގައި ބައިވެރިވެވޭ ގޮތްވީ ވަރަށް މަދު ކުޅުންތެރިންތަކަކަށެވެ. އެއީ ބައެއް ކުޅުންތެރިން ގައުމީ ޓީމަށް ކުޅެންޖެހޭތީއެވެ.

މި ޕްރެކްޓިސްގައި އޭނާ ވަނީ މެންޗެސްޓާރ ޔުނައިޓެޑްގެ ޖޫނިއާރ ޓީމަށް ކުޅޭ 16 އަހަރުގެ ޑިފެންޑަރު ގޮޑްވިލް ކުކޮންކީ އަށް ސީނިއާ ޓީމުގެ ޕްރެކްޓިހުން ޖާގަ ދީފައެވެ. މިއީ ކުކޮންކީ ޔުނައިޓެޑްގެ ސީނިއާ ޓީމުގެ ޕްރެކްޓިހުގައި ބައިވެރިކުރި ފުރަތަމަ ފަހަރު ކަމަށް މެންޗެސްޓާގެ އިވްނިން ޕޯސްޓް އިން ބުންޏެވެ.

ގޮޑްވިލް ކުކޮންކީ 

ޔުނައިޓެޑްގެ ޖޫނިއާރ ޓީމުގައި ކުކޮންކީ ފާހަގަކުރެވިފައި ވަނީ އަރަމުން އަންނަ އުއްމީދީ ކުޅުންތެރިއެއްގެ ގޮތުގައެވެ. އޭނާގެ ކުޅުމުގެ ވައްޓަފާޅި ވައްތަރީ ވާދަވެރި މެންޗެސްޓާ ސިޓީގެ ޑިފެންޑަރު ޔޮސްކޯ ގްވާޑިއޯލްއާ ކަމަށް ގިނަ ބަޔަކު ބުނެއެވެ.

ޔުނައިޓެޑުން ރަސްމީކޮށް އަމޯރިމްއާ އެކު ނުކުންނާނީ އަންނަ އާދިއްތަ ދުވަހު އިޕްސްވިޗް ޓައުންއާ ދެކޮޅަށެވެ.