އިންޓަރގަވަރމެންޓަލް މިނިސްޓީރިއަލް މީޓިން އޮން އެންޓި-ޑޯޕިންގ އިން ސްޕޯޓްސް ނަމުގައި ބޭއްވި ބައްދަލުވުމުގައި ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ބައިވެރިވެވަޑައިގެންފިއެވެ.

މި މަހުގެ 17 އިން 18 އަށް ކުރިއަށްދިޔަ ބައްދަލުވުން އޮތީ ދުބާއީ ގައެވެ.

މި އަހަރީ ބައްދަލުވުމުގައި އޭޝިއާ އަދި އޯޝެނިއާ ހިމެނޭ ގޮތަށް 33 ޤައުމަކުން ގާތްގަނޑަކަށް 80 އަށް ވުރެ ގިނަ އެންޓި-ޑޯޕިންގ ލީޑަރުން (ކުޅިވަރު ވަޒީރުން ހިމެނޭގޮތަށް) ބައިވެރިވެވަޑައިގެންނެވިއެވެ.

މިއީ އޭޝިއާ އަދި އޯޝެނިއާ ހިމެނޭ ގޮތަށް ސަރަހައްދީ ޤައުމުތަކުގެ ސަރުކާރަށް ނިސްބަތްވާ ކުޅިވަރު ވަޒީރުންގެ މެދުގައި މަތީ ފެންވަރުގެ މަޝްވަރާތަކެއް ކުރުމަށް ލިބިގެންދިޔަ ވަރަށް ރަނގަޅު ފުރުޞަތެކެވެ.

މި ބައްދަލުވުމުގައި ޔޫއޭއީ ސަރުކާރުގެ ކުޅިވަރު ވަޒީރު ހިމެނޭ ގޮތަށް އެ ޤައުމުގެ އިސްވެރިންނާއި ވޯލްޑް އެންޓި-ޑޯޕިންގ އެޖެންސީގެ މަންދޫބުންވެސް ބައިވެރިވެވަޑައިގެންނެވިއެވެ.

މީގެކުރީން، 2022 ވަނަ އަހަރު ވެސް ޔޫއޭއީގައި ވަނީ މި ބައްދަލުވުމުގެ 17 ވަނަ އެޑިޝަން ބާއްވާފައެވެ. އެފަހަރުގެ ބައްދަލުވުމުގައި 36 ޤައުމަކުން 14 ވަޒީރުން ބައިވެރިވެވަޑައިގެންނެވިއެވެ. އެންމެ ފަހުގެ ބައްދަލުވުން އުޒްބެކިސްތާންގައި ބޭއްވިއިރު، އެ ފަހަރު 38 ޤައުމަކުން ބައިވެރިވެފައިވެއެވެ.

ދިވެހިރާއްޖޭގެ ކުޅިވަރު ޤާނޫނަށް މިދިޔަ މެއި މަހުގެ 19 ވަނަ ދުވަހު ގެނައި އިޞްލާޙު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތަޞްދީޤު ކުރެއްވުމާއެކު، "މޯލްޑިވްސް ނޭޝަނަލް އެންޓި ޑޯޕިންގ އެޖެންސީ" އަށް ފުރިހަމަ ބާރުވެރިކަން ލިބި ވަކި މުސްތަޤިއްލު މުޢައްސަސާއެއްގެ ގޮތުގައި ވަނީ ހިނގަން ފަށާފައެވެ.