އާއްމުންނާއި މަދަރުސީ ދައުރު ނިންމާ ދަރިވަރުން، އިންޖިނޭރުންގެ ދާއިރާއިން ކުރިއަށްދިއުމުގެ ޝައުގުވެރިކަން އިތުުރުކުރަންޖެހޭ ކަމަށް ގެދޮރުވެރިކަމާ ބިނާރާ ބެހޭ ވަޒީރު ޑރ. ޢަބްދުﷲ މުއްޠަލިބް ވިދާޅުވެއްޖެއެވެ. 

އިންޖިނޭރުންގެ މުހިއްމުކަމާއި ގުޅޭގޮތުން ވަޒީރު ވާހަކަދެއްކެވީ، ރާއްޖޭގައި ފުރަތަމަ ފަހަރަށް ފާހަގަކުރަން ފެށި އިންޖިނޭރުންގެ ދުވަހާ ގުޅިގެން އިއްޔެ މީސްމީޑިއާގައި އާއްމުކުރެއްވީ ވީޑިއޯ މެސެޖެއްގައެވެ. 

މި އަހަރުން ފެށިގެން، ކޮންމެ އަހަރެއްގެ އޮގަސްޓު މަހުގެ 30 ވަނަ ދުވަހަކީ، ޤައުމީ ފެންވަރުގައި ފާހަގަކުރާ، "ދިވެހިރާއްޖޭގެ އިންޖިނޭރުންގެ ދުވަސް" ކަމުގައި ރައީސުލްޖުމްހޫރިއްޔާ ހަމަޖެއްސެވީ، މި ޤައުމުގެ ތާރީޚުގައި މިހާތަނަށް ހިންގުނު އެންމެ ބިޔަ އުމްރާނީ ތަރައްޤީގެ މަޝްރޫޢު ކަމުގައިވާ، ސިނަމާލެ ބުރިޖު އިފުތިތާހުކުރެވުނު ދުވަހަކީ، އޮގަސްޓު މަހެއްގެ 30 ވަނަ ދުވަސް ކަމަށްވާތީ، އިންޖިނޭރުންގެ ދުވަހުގެ ގޮތުގައި ފާހަގަކުރުމަށް އެންމެ އެކަށީގެންވާ ދުވަހަކީ، އެ ދުވަސް ކަމަށްވާތީއެވެ.

ދުވަހުގެ މުނާސަބަތާ ގުޅުވައިގެން ވަޒީރު ޑރ. މުއްޠަލިބް ވިދާޅުވީ، ދިވެހިރާއްޖޭގެ އިންޖީނޭރުންގެ ދުވަހެއް ޤައުމީ ފެންވަރުގައި ފާހަގަކުރަން ސަރުކާރުން ނިންމި މައިގަނޑު ސަބަބަކީ، ރާއްޖޭގެ ތަރައްޤީގެ މިހާހިސާބަށް އާދެވުނުއިރު އިންޖިނޭރުންގެ ޙިއްޞާ އެކަށީގެންވާ ގޮތެއްގައި ފާހަގަކުރެވިފައި ނުވާތީ ކަމަށެވެ. އެކަން ފާހަގަކޮށް އިންޖިނޭރުންނަށް ހިތްވަރުދިނުން މުހިއްމު ކަމަށް ވަޒީރު ޑރ. މުއްޠަލިބް ވިދާޅުވިއެވެ. 

ވަޒީރު ވިދާޅުވީ މިހާރު ކުރަމުންގެންދާ މަސައްކަތުގެ ތެރެއިން ސަރުކާރުގެ އެންމެ ބޮޑު އުއްމީދަކީ އިންޖިނޭރުން ކުރާ މަސައްކަތްތައް ފާހަގަކޮށް އެފަރާތްތަކަށް ހިތްވަރުދިނުމުގެ އެކި ކަންކަން ކުރުމާއެކި ދާއިރާއަށް ނުކުންނަ މީހުންގެ އަދަދު އިތުރުކުރުމެވެ. 

ވަޒީރު ވިދާޅުވީ، ދިވެހިރާއްޖޭގެ ތަރައްޤީގެ މިހާ ހިސާބަށް އައިއިރު އެކިއެކި ދާއިރާތަކުން ކިޔަވާފައިވާ އިންޖިނޭރުންގެ ޙިއްޞާ ވަރަށް ބޮޑު ކަމަށެވެ. އެއީ ހަމައެކަނި އިމާރާތްކުރުމުގެ ދާއިރާ ނޫން ކަމަށާއި، ވަކިވަކި އެހެނިހެން ދާއިރާތަކުން ވެސް އިންޖިނޭރުން ރާއްޖެއަށް ވަރަށް ބޮޑެތި ޚިދުމަތްތަކެއް ކުރައްވާފައިވާކަމަށް ވަޒީރު ވިދާޅުވިއެވެ. 

ވަޒީރު އިތުރަށް ވިދާޅުވީ، އިންޖިނޭރުންގެ މަސައްކަތް ފާހަގަކޮށް އެ ދާއިރާއިން އިންޖިނޭރުން ކުރިއަށްގެންދިއުމަށް ސަރުކާރުން ގިނަ މަސައްކަތްތަކެއް ކުރައްވަމުންގެންދަވާ ކަމަށެވެ. 

އިންޖިނޭރުން ޤައުމަށް ކޮށްދެއްވާ ޚިދުމަތްތަކުގެ އަގު ވަޒަންކުރެއްވުމުގެ ގޮތުން، 2026 ވަނަ އަހަރުން ފެށިގެން އިންޖިނޭރުންގެ ޤައުމީ އެވޯޑް، ސަރުކާރުން ދެއްވަން ފައްޓަވާނެކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިންޖިނޭރުންގެ ދުވަހު ވަނީ ވިދާޅުވެފައެވެ.