ޤައުމީ ބޮޑީބޯޑިންގ ލީގުގެ ފުރަތަމަ މުބާރާތް ކަމަށްވާ، "ބުރުނު ޝިކާރު ބޮޑީބޯޑިންގ ޗެލެންޖް 2025" ގެ ޑްރޮޕްނީ ކެޓަގަރީގެ ޗެމްޕިއަންކަން މި ފަހަރުވެސް އަލީ ހުޝްރުވާން އަހުމަދު (ކުޑަ އައްޔަ) ހޯދައިފިއެވެ.

މި މުބާރާތުގެ ތާރީޚުގައިވެސް މިހާތަނަށް ޑްރޮޕްނީ ކެޓަގަރީގެ ފައިނަލް ހީޓަކުން ކުޑަ އައްޔަ ބަލިވެފައެއްނުވެއެވެ. މި މުބާރާތް އެންމެ ގިނަ ފަހަރު ކާމިޔާބުކޮށްފައިވަނީ ވެސް ކުޑަ އައްޔަ އެވެ. މިއީ ރާއްޖޭގައި ބާއްވާ އެންމެ ދުވަސްވީ ބޮޑީބޯޑިންގ މުބާރާތް ވެސް މެއެވެ.

މުބާރާތުގެ ޑްރޮޕްނީ ކެޓަގަރީގެ ފައިނަލް ހީޓުގައި ކުޑަ އައްޔަ ވަނީ، ޒުވާން ބޮޑީބޯޑަރު، އާމިން އުމަރު މޫސާ ބަލިކޮށްފައެވެ.

ކުޑަ އައްޔަ ފައިނަލަށް ދަތުރުކުރީ ސެމީ ފައިނަލްގައި މުޙައްމަދު އަޒާން އަހްމަދު ބަލިކޮށްގެންނެވެ. ސެމީގައި ކުޑަ އައްޔަ ވަނީ، 11.83 ސްކޯ ކޮށްފައެވެ. އަޒާން އަށް ސްކޯ ކުރެވުނީ 3.70 އެވެ.

އާމިން ފައިނަލަށް ދިޔައީ ސެމީގައި ދާއިން އަބްދުލް ފައްތާހު ބަލިކޮށްގެންނެވެ. މި ހީޓުގައި އާމިން ވަނީ 6.94 ސްކޯ ކޮށްފައެވެ. ދާއިން އަށް ސްކޯ ކުރެވުނީ 1.54 އެވެ.

މުބާރާތުގެ ފައިނަލް ހީޓުން ކުޑަ އައްޔަ ކާމިޔާބު ހޯދީ 11.00 ސްކޯ ކޮށްގެންނެވެ. އާމިން އަށް ސްކޯ ކުރެވުނީ 4.67 އެވެ.

ފައިނަލް ހީޓުގައި ކުޑަ އައްޔަ މުޅިއެކު ހަތަރު ރާޅުގައި އެޅިއިރު، އެންމެ މަތިން ސްކޯކުރީ ފުރަތަމަ އަދި ތިންވަނަ ރާޅުގައެވެ. އެގޮތުން، ފުރަތަމަ ރާޅުގައި ކުޑަ އައްޔަ 3.83 ސްކޯ ކުރިއިރު، ތިންވަނަ ރާޅުގައި ވަނީ 7.17 ސްކޯ ކޮށްފައެވެ.

މި ކެޓަގަރީގެ ފައިނަލް ހީޓުގައި ވާދަކުރި އާމިން މުޅިއެކު އަށް ރާޅުގަ އެޅިއިރު، އޭނާ އެންމެ މަތިން ސްކޯކުރީ ހަތްވަނަ އަދި އަށްވަނަ ރާޅުގައެވެ. ހަތްވަނަ ރާޅުގައި 2.50 ސްކޯ ކުރިއިރު، އަށްވަނަ ރާޅުގައި ސްކޯ ކުރެވުނީ 2.17 އެވެ.