ކައްކާ ގޭސް ރައްކާކުރުމުގެ ގާބިލްކަން އިތުރުކުރުމަށް ގާތްގަނޑަކަށް 70 މިލިއަން ރުފިޔާގެ މަޝްރޫޢެއް ފަށާފައިވާ ކަމަށް މޯލްޑިވް ގޭސް ޕްރައިވެޓް ލިމިޓެޑްގެ މެނޭޖިން ޑިރެކްޓަރ ޢަބްދުﷲ މުޙައްމަދު ވިދާޅުވެއްޖެއެވެ.

ޕީއެސްއެމް ނިއުސްގެ ހަފްތާ 52 ޕްރޮގްރާމުގައި ވާހަކަދައްކަވަމުން ޢަބްދުﷲ މުޙައްމަދު ވިދާޅުވީ، ވޭތުވެދިޔަ 25 އަހަރު ކުންފުންޏަށް އޮތް އެންމެ ބޮޑު ގޮންޖެހުމަކީ ގޭހުގެ ސްޓޯރޭޖްގެ ދަތިކަން ކަމަށެވެ. މުޅި ރާއްޖެ އަށް ބޭނުންވާ ކައްކާ ގޭސް މިހާރު ރައްކާކުރެވެނީ އެންމެ އެއް މަސް ދުވަހަށް ކަމަށާއި، ނަމަވެސް މި އާ މަޝްރޫޢާއެކު ހަތަރެއް ނުވަތަ ފަސް މަސް ދުވަހަށް ގޭސް ރައްކާކުރުމުގެ ގާބިލްކަން އިތުރުވެގެންދާނެ ކަމަށް އޭނާ ވިދާޅުވިއެވެ.

މި މަޝްރޫޢު އަންނަ އަހަރުތެރޭ ނިމޭނެ ކަމަށާއި، މިއާއެކު ކައްކާ ގޭސް ރައްކާކުރުމުގެ ގާބިލްކަން ތިން ގުނައަށް އިތުރުވެގެންދާނެ ކަމަށް ވެސް ޢަބްދުﷲ މުޙައްމަދު ވިދާޅުވިއެވެ.

މީގެއިތުރުން، މޯލްޑިވް ގޭސްއަކީ ކުންފުންޏަށް ލިބޭ އާމްދަނީން ހިންގަމުން އަންނަ، ފައިދާވާ ކުންފުންޏެއްކަން ފާހަގަކުރައްވައި، އަބްދުﷲ ވިދާޅުވީ ވޭތުވެދިޔަ އެއް އަހަރު 33 އިންސައްތައިގެ ކުރިއެރުމެއް ލިބިފައިވާ ކަމަށެވެ. މި ކުރިއެރުން ލިބުނީ ސަރުކާރުގެ ސިޔާސަތުގެ ސަބަބުން ކަމަށް ވެސް އޭނާ ފާހަގަކުރެއްވިއެވެ.

ޢަބްދުﷲ މުޙައްމަދު އިތުރަށް ވިދާޅުވީ، ކުންފުނި ހިންގަމުންދަނީ ޚާއްސަ އަމާޒުތަކެއް ކަނޑައަޅައި، އެ އަމާޒުތައް ހާސިލްކުރުމަށް މުވައްޒަފުން ގުޅިގެން މަސައްކަތްކުރުމުގެ ރޫހުގައި ކަމަށެވެ. މިގޮތުން މި އަހަރު ތެރޭގައި ހޯދާފައިވާ ކާމިޔާބީތަކާއެކު ތިން ފަހަރެއްގެ މަތިން މުވައްޒަފުންނަށް ބޯނަސް ދީފައިވާ ކަމަށް ވެސް އަބްދުﷲ ވިދާޅުވިއެވެ.