އަންނަ އަހަރު ނިމުމުގެ ކުރިން ސްޓެލްކޯގެ ހުރިހާ ކަސްޓަމަރުންނަށް ސްމާޓް މީޓަރުގެ ޚިދުމަތް ދޭނެ ކަމަށް އެ ކުންފުނީގެ މެނޭޖިން ޑިރެކްޓަރު ހުސައިން ފަހުމީ ވިދާޅުވެއްޖެ އެވެ.

ސަރުކާރަށް 52 ހަފްތާ ފުރުމާ ގުޅިގެން ޕީއެސްއެމް ނިއުސްއަށް ދެއްވި ޚާއްސަ އިންޓަވިއުއެއްގައި ފަހުމީ ވިދާޅުވީ ހުޅުމާލެ ފޭސް 2 ގައި ސްމާޓް މީޓަރު ހަރުކުރުމުގެ މަސައްކަތް ވަރަށް އަވަހަށް ނިންމާލާނެ ކަމަށެވެ.

"ގޭބީސީތަކުގައި ސްމާޓް މީޓަރ ހަރުކުރުމުގެ މަސައްކަތް ވެސް ވަރަށް ޚާއްސަ އިސްކަމެއްދީގެން ކުރަމުން މި އަންނަނީ. އަންނަ އަހަރު ނިމުމުގެ ކުރިން ސްޓެލްކޯގެ ހުރިހާ ކަސްޓަމަރުންނަށް ސްމާޓް މީޓަރގެ ޚިދުމަތް ފޯރުކޮށްދެވޭނެ،" ފަހުމީ ވިދާޅުވިއެވެ.

ސްމާޓް މީޓަރ ޕްރޮޖެކްޓާއެކު ކަރަންޓް ބިލް ބޮޑުވެގެން ކަސްޓަމަރުންގެ ފަރާތުން އަންނަ ކަންބޮޑުވުންތަކަށް ހައްލު ލިބިގެންދާނެ ކަމަށް ވެސް ފަހުމީ ވިދާޅުވިއެވެ.

މީގެ އިތުރުން މާލޭގެ މަގުތަކުގައި ހަރުކޮށްފައިވާ ލައިޓްތައް މެނުއަލްކޮށް ދިއްލާ ނިއްވޭ ގޮތް ހެދުމުގެ މަސައްކަތް ކުރިއަށްދާ ކަމަށް ވެސް އޭނާ ވިދާޅުވިއެވެ. މިއީ ޚަރަދު ކުޑަކުރުމަށް އެ ކުންފުނިން ކުރަމުންދާ މަސައްކަތުގެ ބައެއްކަން ފަހުމީ ފާހަގަކުރެއްވިއެވެ.

ފަހުމީ ވިދާޅުވި ގޮތުގައި، މިހާރު މަގުމަތީގައި ހުރި ލައިޓްތައް އޮޓޯމެޓިކްކޮށް ނިވި ދިއްލޭތީ ގާތްގަނޑަކަށް ކޮންމެ ދުވަހަކު 40 މިނެޓް ބޭކާރުވެއެވެ. މިއީ ވަރަށް ބޮޑު ޚަރަދެއް ކަމަށް ފާހަގަކުރައްވައި، މިހާރު މަސައްކަތްކުރަމުންދަނީ ސްޓެލްކޯ އިން އަމިއްލައަށް ލައިޓްތައް ޖައްސައި، ނިއްވާލެވޭ ގޮތަށް ހެދުމަށް ކަމަށް ވިދާޅުވިއެވެ.