ހަ ޤައުމަކުން ދިވެހިރާއްޖެއަށް ކަނޑައެޅުއްވި އައު ނޮން-ރެސިޑެންޓް ސަފީރުން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއަށް މަޤާމުގެ ފަތްކޮޅު މިއަދު އަރުވައިފިއެވެ. 

ނޮން-ރެސިޑެންޓް ސަފީރުން ކަނޑައަޅުއްވައި ރައީސުލްޖުމްހޫރިއްޔާއަށް މަޤާމުގެ ފަތްކޮޅު އެރުވީ، ފަލަސްތީނުގެ އިތުރުން، ޔޫގާންޑާ، ގްރީސް، ޑެންމާކް، ޒިމްބާބްވޭ އަދި އުޒްބަކިސްތާނުންނެވެ. 

މަޤާމުގެ ފަތްކޮޅު އެރުވުމުގެ ރަސްމިއްޔާތު އޮތީ މިއަދު ހެނދުނު ރައީސުލުޖުމްހޫރިއްޔާގެ އޮފީހުގައެވެ. ޤައުމުތަކުގެ ނޮން-ރެސިޑެންޓް ސަފީރުން ރައީސުލްޖުމްހޫރިއްޔާގެ އޮފީހާ ހަމައަށް ވަޑައިގެންނެވީ ހަތްކޮޅުގައި ރަސްމީ އިއްޒަތުގައި، މޯލްޑިވްސް ނެޝެނަލް ޑިފެންސް ފޯސް (އެމްއެންޑީއެފް)ގެ ބެރު ދުންމާރި ތާޅަފިލީގައި، ހެވިކަމުގެ ލަޝްކަރީންނާއެކު ހިންގަވައިފައެވެ.

އައު ނޮން-ރެސިޑެންޓް ސަފީރުން މަޤާމުގެ ފަތްކޮޅު އެރުވުމުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ތަހުނިޔާ ވިދާޅުވެ މަރުޙަބާ ދަންނަވައިފައެވެ. 

ރައީސުލްޖުމްހޫރިއްޔާ ވަނީ ޤައުމުތަކުން ކަނޑައެޅުއްވި ނޮން-ރެސިޑެންޓް ސަފީރުންނާ ވަކިވަކިން ބައްދަލުކުރައްވައި، އެ ޤައުމުތަކާއި ރާއްޖެއާ އޮތް ގުޅުމާއި ގުޅޭގޮތުން މަޝްވަރާކުރައްވައިފައެވެ. އަދި، ވަކިވަކި ޤައުމުތަކާއެކު ގުޅުން ބަދަހިކުރާނެ ގޮތްތަކާއި ދާއިރާތަކާއި ގުޅޭގޮތުން މަޝްވަރާކުރައްވާފައިވެއެވެ.