ޅ. ފެލިވަރުގެ މަސްކާރު ޚާނާ އަޕްގްރޭޑްކުރުމާއި ފިޔޯރީ މަސްކާރުޚާނާގެ މަސައްކަތް ފަށަން ސަރުކާރުން ނިންމައިފި އެވެ.

މި ސަރުކާރުގެ އަމާޒަކީ ފެލިވަރުގައި 100 ޓަނުގެ މަސް ޕްރޮސެސް ކުރެވޭ މުޅިން އާ ކާރުޚާނާއެއް ގާއިމުކުރުމެވެ. މިއީ ޗައިނާގެ ދޮންގފަންގ އިލެކްޓްރިކް އިންޓަނޭޝަނަލުން ކޮންޓްރެކްޓަރ ފައިނޭންސިންގ ދަށުން ކުރިއަށް ގެންދާ ޕްރޮޖެކްޓެކެވެ.

ގދ. ފިޔޯރީގައި ވެސް ދުވާލަކު 100 ޓަނުގެ ދަޅު މަސް ބަންދުކުރާ ކާރުޚާނާއެއް އެޅުމުގެ މަސައްކަތް މިހާރު ދަނީ ކުރަމުނެވެ. މި ކާރުޚާނާއާ އެކު 3،000 ޓަނުގެ މަސް ފިނިކޮށް ރައްކާކުރެވޭނެ ކޯލްޑް ސްޓޯރޭޖަކާއި 100 ޓަނުގެ ފިޝް މީލް ޕްލާންޓަކާއި 100 ޓަނުގެ އައިސް ޕްލާންޓެއް ފިޔޯރީގައި ގާއިމްކުރެވޭނެއެވެ. މި ކާރުޚާނާއަކީ ވެސް ކޮންޓްރެކްޓަރ ފައިނޭންސްގެ ދަށުން ޗައިނާގެ ދޮންގފަންގ އިލެކްޓްރިކް އިންޓަނޭޝަނަލުން ކުރިއަށް ގެންދާ މަޝްރޫއެކެވެ.

ޅ. ފެލިވަރުގައި ހުރި މިފްކޯގެ ޕްރޮސެސިން ކާރުޚާނާއަކީ 1978 ގައި ޖަޕާންގެ މިޓުސުބުޝީ ކުންފުނިން ހިންގިއިރު ބިނާކޮށްފައިވާ ކާރުޚާނާއެކެވެ. މިއަދާއި ހަމައަށް އައިއިރު އިތުރު ޕައުޗު ލައިންއެއް އެޅުން ފިޔަވައި އެއްވެސް އަޕްގްރޭޑެއް އެ ކާރުޚާނާއަކަށް ގެނެސްފައެއް ނުވެއެވެ.

މި ވަގުތު ފެލިވަރުގެ މަސްކާރުޚާނާގެ ކެޕޭސިޓީއަކީ ދުވާލަކު 50 ޓަނެވެ. އެހެންމަނަވެސް އެވްރެޖްކޮށް ބޭނުން ކުރަމުންދާ ކެޕޭސިޓީއަކީ 35 ޓަނެވެ.