ސީ-ޓު-އެއަރ ކާގޯ ޚިދުމަތް ފުޅާވަމުން އަންނައިރު، މިހާތަނަށް މި މަސައްކަތުން ރާއްޖޭގެ އިޤްތިޞާދަށް ތިން މިލިއަނަށްވުރެ ގިނަ ޑޮލަރު ވަދެފައިވާކަމަށް މޯލްޑިވްސް ޕޯޓްސް ލިމިޓެޑް (އެމްޕީއެލް)ގެ ސީއީއޯ މުޙައްމަދު ވަޖީހު އިބްރާހީމް ވިދާޅުވެއްޖެއެވެ.

ސީ-ޓު-އެއަރ ކާގޯ ޚިދުމަތަކީ، ކަނޑުމަގުން އަންނަ މުދާ ޓްރާންސިޓްކޮށް ވައިގެ މަގުން ދުނިޔޭގެ އެހެން ޤައުމުތަކަށް ފޮނުވުމެވެ. މި ޚިދުމަތް އެމްޕީއެލްއިން ތަޢާރަފުކުރީ މި އަހަރުގެ މާރޗު މަހު އެވެ. އަދި ފުރަތަމަ ޝިޕްމަންޓް ރާއްޖެއިން ފޮނުވީ މެއި މަހުގެ ތެރޭގައެވެ.

ސޯޝަލް މީޑިއާގައި ހިއްސާކުރެއްވި ޕޯސްޓެއްގައި ވަޖީހު ވިދާޅުވީ، ރައީސް ޑރ. މުޙައްމަދު މުޢިއްޒުގެ ވެރިކަމުގައި ރާއްޖޭގެ އިޤްތިޞާދު ހަރުދަނާކުރެއްވުމަށް ފެއްޓެވި މަސައްކަތްޕުޅުތަކުގެ ތެރޭގައި ހިމެނޭ މި ޚިދުމަތް ވަރަށް ބާރަށް ފުޅާވަމުން އަންނަ ކަމަށެވެ. އަދި މިއީ ރާއްޖޭގެ އިޤްތިޞާދަށް ބޮޑު މަންފާއެއް ކުރާނެ ސިނާޢަތެއްގެ ގޮތުގައި އޭނާ ފާހަގަކުރެއްވިއެވެ.

ހިސާބުތައް ދައްކާ ގޮތުން، މިހާތަނަށް ކަނޑުމަގުން ރާއްޖެ އައި 210 ކޮންޓެއިނަރުން 1,008,000 (އެއް މިލިއަން އަށްހާސް) ކިލޯގެ މުދާ ވަނީ ދުނިޔޭގެ އެކި ޤައުމުތަކަށް ވައިގެ މަގުން ފޮނުވައިފައެވެ. މި މުދާ ރާއްޖެއިން ބޭރަށް ގެންދިއުމުގައި 11 އެއަރލައިނަކުން މިހާތަނަށް ވަނީ ބައިވެރިވެފައެވެ.

މުދާ ފޮނުވޭ ޤައުމުތަކުގެ ތެރޭގައި އެމެރިކާ، ކެނެޑާ، އިނގިރޭސިވިލާތް އަދި ޔޫރަޕުގެ ޤައުމުތައް ހިމެނެއެވެ. ސީ-ޓު-އެއަރ ކާގޯގެ ޚިދުމަތް މެދުވެރިކޮށް އާންމުކޮށް ރާއްޖެއިން ބޭރުކުރަނީ ބަންގްލަދޭޝްގައި އުފައްދާ އަންނައުނުގެ ބާވަތްތަކެވެ.

ރާއްޖޭގައި މި ޚިދުމަތް ދެނީ މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް)، މޯލްޑިވްސް ޕޯޓްސް ލިމިޓެޑް (އެމްޕީއެލް) އަދި މޯލްޑިވްސް ކަސްޓަމްސް ސަރވިސް ގުޅިގެންނެވެ.