ބަންގްލަދޭޝް އާއި ރާއްޖޭގެ ގައުމީ ފުޓްބޯޅަ ޓީމުން ކުޅުނު އެކުވެރިކަމުގެ ދެވަނަ މެޗު ބަންގްލަދޭޝް އިން ކާމިޔާބުކޮށް ބަދަލު ހިފައިފިއެވެ.

ބަންގްލަދޭޝްގެ ޑާކާގައި ކުޅުނު މި މެޗު ބަންގްލަދޭޝް އިން ރާއްޖެ ބަލިކޮށްފައިވަނީ 2-1 ގެ ނަތީޖާ އަކުންނެވެ. ބައިނަލްއަގުވާމީ އެކުވެރިކަމުގެ ފުރަތަމަ މެޗުގައި ރާއްޖެއިން ވަނީ ބަންގްލަދޭޝް 1-0 އިން ބަލިކޮށްފައެވެ. ރާއްޖޭގެ ގައުމީ ޓީމުން އަހަރެއްހާ ދުވަސް ފަހުން ބައިނަލްއަގުވާމީ އެކުވެރިކަމުގެ މެޗުތަކެއް ކުޅެފައިވާއިރު، މި ދެ މެޗު ވެސް ކުޅެފައިވަނީ ބަންގްލަދޭޝްގައެވެ.

ދެ ޓީމުގެ ފަރާތުން ވާދަވެރި ކުޅުމެއް ވަނީ ފެނިގެން ގޮސްފައެވެ. މި މެޗުގައި ފުރަތަމަ ގޯލު ކާމިޔާބުކޮށް މެޗުގެ ލީޑު ނަގާފައިވަނީ ރާއްޖެއިންނެވެ. ލީޑު ނަގައިދީފައިވަނީ މެޗުގެ 23 ވަނަ މިނެޓުގައި އަލީ ފާސިރު (ސެންޓޭ)އެވެ.

މެޗުގެ ފުރަތަމަ ހާފުގެ ކުޅުން ނިމެން އުޅެނިކޮށް ބަންގްލަދޭޝް އިން ވަނީ ގޯލެއް ކާމިޔާބުކޮށް ރާއްޖެއާ އަރާ ހަމަކުރިއެވެ. މެޗުގެ 44 ވަނަ މިނެޓުގައި މި ގޯލު ބަންގްލަދޭޝްއަށް ކާމިޔާބުކޮށްދިނީ ޖޯނީއެވެ. މިއާއެކު މެޗުގެ ފުރަތަމަ ހާފުގެ ކުޅުން ނިމިގެން ދިޔައީ 1-1ގެ ނަތީޖާ އަކުން ދެ ޓީމު އެއްވަރުވެގެންނެވެ.

މެޗުގެ ދެވަނަ ހާފު ފަށައިގެން ވެސް ދެ ޓީމުގެ ފަރާތުން ވާދަވެރި ކުޅުމެއް ފެނިގެން ގޮސްފައިވާއިރު، ދެ ޓީމަށް ވެސް ގޯލު ޖަހާނެ ރަނގަޅު ފުރުސަތުތަކެއް ވަނީ ލިބިފައެވެ. ނަމަވެސް ދެ ޓީމުން ކުރެ އެއްވެސް ޓީމަކަށް ގޯލެއް ކާމިޔާބުނުކުރެވި މެޗު ނިމެން ދަނިކޮށް ބަންގްލަދޭޝްއިން ވަނީ ގޯލެއް ކާމިޔާބުކޮށް ރާއްޖޭގެ މައްޗަށް ކުރި ހޯދައިފައެވެ. މި ގޯލު ބަންގްލަދޭޝްއަށް ކާމިޔާބުކޮށްދީފައިވަނީ ޕަޕޯން ސިންހްއެވެ.